Bel Bel's Lifebook ♥ 自言自語

尋日真係捉到鹿唔識脫角，睇到樸茨茅夫四場無失波，本應 tip 佢地尋日唔失波，平手盤坐左望嬴兼入球細先岩，點知又做左燈后添 。

今日就 tip 下呢場荷甲早場，PSV 燕豪芬 vs 飛燕諾。佢地分別在上週三及週四參戰歐聯及歐協，而咁岩佢地都係和波。

自開季以黎，燕豪芬四戰兩勝一和一負，據有些睇過佢地首戰作客對川迪的賽事，佢地都認為燕豪芬缺少左去季的霸氣，不過之後的三場賽事似乎有改善，上星期三在主場迎戰利物浦都能抵擋利記多番的攻門。今仗對飛燕諾，雖然高古因傷缺陣，不過今季剛回巢的前鋒古華特，今場應會上陣。

飛燕諾呢班波？上季相信佢地為好多賭仔輸左唔少錢了。近年的飛燕諾的成績始於不及燕豪芬及阿爾克馬爾，而且俾人的感覺係退步左，上季作客 17 場，8 勝 4 和 5 負，只係嬴過阿績士，其餘嬴的只係中至下游的隊伍，作客一般。今季首戰對格羅寧根仲要輸 3:0 添！

再者，飛燕諾今季無左主力射手古積特和沙洛文卡勞，實力大減。加上燕豪芬主場成績彪炳，上季至今仍然 keep 住不敗。所以小妹 tip 燕豪芬主場全取三分。

以近期兩隊波的狀況黎講，查爾頓自開 League 以黎，雖然睇起黎在四場賽事只係嬴過保頓，其餘的賽事都輸晒，其中兩場佢地係輸俾英超班霸車路士和曼聯，另外一場作客敗給韋斯咸，不過係呢場波查爾頓打少一個，他們在領先一球後再被主隊反勝。他們的近況好差？都唔係既，不過佢地都係好似上年咁，又入得，又失得。

至於樸茨茅夫，自從上季有俄羅斯財團注資後，佢地係球季後段的表現確有改善，而且在季尾更連嬴多場而成功護級。今季季初購入門將占士，中堅蘇金保及左閘格連莊臣，這條新組成的後防線令他們在開 League 後的賽事中未失一球，四場三勝一和的佳績令佢地高踞聯賽榜第二位。

不過在盤口方面卻有點古怪。近態咁好的樸茨茅夫居然只開平手盤，唔駛讓波又真係幾著數，也許是因為在往績上，查爾頓在主場未輸過俾樸茨茅夫有關吧。在小妹打篇文的時候，查爾頓由平手低水回到中水，不過始終呢個盤都係有點古怪，故小妹今日並非推介邊隊會嬴，而係推介入球大。因為查爾頓的後防線真係好唔掂，而且馬會的入球大有 2.02 ，都幾好分頭架。

祝各位今晚嬴多 d。:)

最近 now! 的歐聯廣告裡的卡通人物，總是令我想起很久以前令我著迷的足球小將動漫畫。:-)

岩岩又諗起上屆的決賽，巴塞對阿仙奴。自己心裡明白，上屆歐聯冠軍必定屬於巴塞，論人腳，論實力及把握性，巴塞無疑比阿仙奴更勝一籌。不過親眼看見巴塞由落後至後來居上，總是難免心傷。

久違了的歐聯今晚再次上演了。雖然阿仙奴近三場英超都無嬴波，但都希望佢地可以努力 d，至少拿到小組次名吧。

巴西:

卡卡在中場的作用真係好大，佢一換入黎就為球隊組織唔少具威脅的攻勢，盡顥球星功架，絕對係巴西中場的靈魂人物，發電機。

依蘭奴同埋羅賓奴的表現都好搶鏡，兩人在前線上的合作都不錯，而且依蘭奴為球隊梅開二度。

鄧加執教的巴西，後防比以往較為「穩陣」。

阿根廷:

後防可用「亂」字來形容，無默契。

雖然控制中場時間比巴西多，不過有威脅的攻勢卻唔多，就算有都被巴西後防一腳清走。

泰維斯都係獨食怪，美斯同佢好似唔多夾。

睇見呢兩場波阿仙奴的進攻，發覺中前場好想組織一些漂亮的攻勢，好多時亨利在禁區帶住個波，他都唔會直接起腳，而係交波俾雲佩斯，艾迪巴約等去埋門，似乎亨利開始轉型，做一個在中前場「分波」的角色。不過希比，路斯基，扭到入小禁區又唔肯起腳，跟住俾人搶左個波。

亨利近期狀態低沉入唔到波，同埋阿仙奴近期黑仔，射親門都中柱，都係令球隊嬴唔到波的原因之一。不過阿仙奴近期的進攻過於迂迴，想將個波搓到最華麗才肯起腳，可是呢個時候已經俾對方的後防睇通條路，而成功把皮球搶去，導致阿仙奴無法入波。阿仙奴在進攻上太過追求完美，也許是阿仙奴今年既缺點。

當年令我傾心的阿仙奴水銀潟地的足球去了哪兒呢？我諗過如果當 fit 的龍格堡，皮利斯，柏金，雷耶斯都在陣的話，做出同樣的組織便會入球。時移世易，除了要給予時間阿仙奴一班小將去磨練之外，我想他們有必要踢得直接點了。

今日心血來潮，就去左尖沙咀海港城地下的日本 fusion 餐廳 Miso 食 lunch。這餐廳的的裝修給予的感覺頗高雅，而且許多座位都是梳化，很舒適。

餐廳外貌

我點了 set lunch 的其中一款菜式︰海鮮雜錦鍋烏冬。這個 set lunch 包括一碟三文魚刺身和蟹子手卷，另外加 $18 便有一杯飲品或雪糕，而我便點了綠茶雪糕。海鮮雜錦鍋烏冬除了烏冬，材料還有煎蛋，日式甜腐皮，冬菇，白菜等，味道幾清淡，比較適合減肥中的 OL 食用。

食物質素都不錯，不過對於我來說沒有特別驚喜，可能晚餐的菜式會更好吧。此外，這兒也是三五知己聚餐的好地方，因為梳化座椅令人坐得很舒服。另外侍應的服務態度真的很好。

下星期日我又大一歲了。今日下午我突然心血來潮，瀏覽我 harddisk 內很久沒有打開的 folder，找到了五年前我在我的個人網頁的日記，重溫後頓時感慨起來。

當年我在「介紹自己」的一欄裡的文章︰

我每一天很努力地去做夢，
努力去追求成功、金錢和男人。
但每一次夢醒之後總是很慘，
夢醒之後便要回復孤獨、窮困，
而且更有許多不如意和失敗的事情要找我。
連我也不知為何，我的夢永遠也不會有實現的一天。

然而，我選擇在這個小小的空間去做我的夢︰
而我的夢便是做自己想做的設計、寫自己的文章、向有緣人分享我的感受。

五年前的我，跟現在的我沒有兩樣，同樣沒有目標、沒有事業、沒有成功、沒有金錢、沒有男人。現在的我，還是在這小小的空間去實現我的夢想。不同的是，我的工作經驗多了點，和我已經不想再做 designer 了。

我的目標是什麼？還是努力地想......

尋日做左燈神，推個兩場全負。咁各位路過的讀者要 bookmark 呢度喇，因為長買我對家一定幫到你買車又買樓！

今日試下出一場 J-League 的心水先，

雖然千葉巿原陣中的射手卷誠一郎及另外三位球員週中代表國家隊上陣，今仗未知能否上陣，不過古尼高域、夏斯及要田勇一等預料會上陣，攻力信得過。

翻番對賽往績，雙方近六場對碰有五次開大，事實上千葉巿原攻力強勁，所以經常出開入球大，另外澳彩開出千葉巿原讓半一，而且己經跌到低水，馬會的主勝己由1.65 稍落到 1.6 倍。

呢場波一於追入球大，而且千葉巿原主勝稍稍睇好。

眨下眼又到 8 月 19 日了，今日係英超開鑼的大日子呢，無論各位球迷賭波又好，唔賭波又好，都好期待英超的再現，因為好多人都係車仔，阿仙奴，利記同埋紅魔鬼的 fans 嘛！等我都趁下熱鬧，講下今晚的心水先。

首先講下紐卡素對韋根的賽事啦。翻查紐卡素的開 League 戰的往績，近 8 次開 League 戰，他們只是嬴過一場。要留意o既o係，喜鵲周中要在主場對雲特史比斯，踢歐協外圍賽的次回合，要小心佢地會留力呀。至於韋根在近過去 7 場季前熱身賽的表現不俗，5 勝 2 和，近態睇黎幾好咁喎。

至於盤口方面，澳門初初開出紐卡素讓半一的數據，不過在今日下午已經回飛回到讓半球中水。而馬會就一直開出讓半一超高水。

我覺得紐卡素今晚信唔過，一於撐韋根不敗！

另外一場阿仙奴對阿士東維拉，阿仙奴在主場對維拉的往績係嬴晒既，不過佢地搬左去阿聯酋球場，或者有人會覺得阿仙奴班球員未必適應場地。加上後衛辛特路斯肩膀有傷，上陣成疑，而蘇金保也已離隊轉投樸茨茅夫，艾殊利高爾和雷耶斯因轉會問題未解決，今場預計不會上陣。預計今場年輕的阿仙奴後衛佐羅與托尼在中路搭檔。

既然阿仙奴後防有隱憂，如其博主勝不如博入球大。

自問唔係一個「識」睇波的球迷。其實球隊的戰術運用，球員在某隊中的作用等，我並不太會分析，更何況和朋友討論，甚至有時連球員的名字也未全部弄懂。所以在和朋友出外睇波的時候，我是默默地欣賞賽事的一個。不過我倒享受看到球員入波後那種興奮的表情，及千奇百種的慶祝方式，在這個時候，往往是最體現球員間團結的精神。

好希望有朝一日我會學懂「睇」波呢！看見 Rita 由一個完全唔識足球，到最近開始在東方寫波經，她一直都很努力，朝著成為成功的足球節目主持的理想進發。另外梁禮勤都係出晒名識波的女主持呢。她們做到既野，我相信終有一日我都會做到！

週日睇過德甲的賽事︰漢諾威對雲達不萊梅。這場雲達不萊梅又再次表現出他們「後勁王」的本色，上半場廸亞高 19 分鐘撕破對方的防線，在禁區勁射破網，先拔頭籌。然後漢諾威一度追平，下半場更被伊朗中鋒夏舒文反超前 2:1。不過一向後勁凌厲的雲達不萊梅，在廿分鐘內連入三球，結果以 4:2 氣走主隊漢諾威。

當曉高艾美達為雲達扳平成 2:2 時，我心想他們一定可以好似 n 季前作客對禾夫斯堡的賽事中，反敗為勝。而到左高路斯為己隊射成 3:2 時，我忍不住興奮得大叫起來呢。

記得 n 季前作客對禾夫斯堡的賽事中，當時禾夫斯堡上半場領先 2:0，不過到左70分鐘左右，雲達不萊梅就 bang bang 聲咁連入三球。真係 Super~~ ！這是其中一場令我印象最深刻的賽事之一。

一向都喜歡看進攻足球，一向都喜歡有鬥心的球隊。我也漸漸地喜歡雲達不萊梅了 (雖然後防都係麻麻，不過既然有能力入球，失一兩球又何足擔憂？)

8 月 13 日社區慈善盾: 利物浦 vs 車路士的賽事，利物浦最後以 2:1 擊敗車路士。

雖然我無法看到這場賽事，不過聽大頭仔在週日球彩台報告說，利物浦基本上控制戰局，而且俾左車路士好多威脅，而舒夫真高在臨完半場前為車路士射成扳平的一球，全賴其個人質素。

今日足彩夢工場的主持人認為，由於車路士今季買了許多人，不過對球隊作用未必那麼大，好像波歷克。而舒夫真高和杜奧巴的位置重疊了。而且為了一些新球員，而改變了他們最煞食的 4-4-1-1 陣式。

小妹就認為車路士買人方面出手比較闊綽，不過坦白講他們買人的眼光一般，好像已離隊的基士文。其實我覺得杜奧巴經常錯失許多攻門機會，講埋門許多前鋒都比他好。

至於盤口方面，馬會的車路士客勝在開賽事三十分鐘左右跌到 1.9 倍。不過澳彩卻一直 keep 住讓半球 1.0x。而且香港所有報章都一齊 tip 車路士客勝，大部分賭波的網友都一樣投注車路士客勝。可能就係咁邪，車路士就係咁熱死左！

小妹後來發覺自己之前忽略了一件事，就是雖然利物浦在之前的熱身賽成績欠佳，不過他們在多場的熱身賽中，漸漸地提升了比賽狀態和體能，而且試出了較適合的隊型。相反車路士只踢了三場熱身賽，在球員默契方面有待磨合。

另外如果莊家睇好車路士客勝，開盤應開讓半球中水，並非讓半球高水或者由讓平半轉讓半球高水。還有車路士在所有杯賽都未試過在 90 分鐘內嬴到利物浦這個宿命，這點小妹都忽略了。

作晚的賽果也頗為爆冷，首先大熱的漢堡昨晚雖然好有 heart，好想嬴到比勒費爾德，可惜勝利之神並沒有眷顧佢地，最終只能 1:1 握手言和。而史浩克 04 及史特加更分別以 1:1 賽和法蘭克福及0:3 不敵紐倫堡。另外一支被視為奪標大熱的里昂，在臨完場前失望地被圖盧茲追成平手完場。希望今晚的賽事會正路一點，尋晚輸錢的球迷今晚可以收復失地啦。

今晚的慈善盾，我都幾有心水架，今晚我一於支持車路士在 90 分鐘之內 KO 利物浦。

睇番佢地最近的熱身賽的成績，從佢地的入球數字及賽後報告中，發覺兩隊球員的狀態都未操起，可能這跟他們陣中大部分球員都參與世界盃賽事有關，也許球員們的休息不是很足夠。看罷上週三利記對海法馬卡比的歐聯外圍賽賽事，面對對方的防守都無晒計，最後幾經辛苦地僅勝對手。雖然佢地舉行五場熱身賽，還要連輸三場，失球數字偏多，看來他們的後防有很大的漏洞。他們嬴的只是克魯和域斯咸等實力較次的隊伍。

其實車路士的近態同樣麻麻，不過佢地的友賽便沒有利物浦那麼頻密。在最近的三場熱身賽，車路士的入球數字偏少，平均只入一球，不過佢地的防守依然硬淨，最多每場只失一球。今晚的慈善盾，波歷克及舒夫真高應會上陣，將會令中前場的攻力大為提升。

足智彩的賠率方面，馬會的初盤是利物浦主勝 3.4，和波 3.1，車路士客勝 2.0。讓球盤方面，初盤為車路士讓半球 2.0，利記受讓半球 1.76。而澳彩的初盤賠率是車路士讓平半 1.85，直到執筆時間，車路士己由讓平半升盤到讓半球 1.98。

對比上季足總盃準決賽的盤口，車路士都是讓利物浦平半，不過當時車路士是由高水落到中水。結果利物浦在 90 分鐘內擊敗車路士 2:1。今次一開盤，馬會便開出車路士讓半球，似乎稍為睇高車路士。

入球細也是一個不俗的選擇，波膽車路士 1:0 小勝。

我的 blog 開張了！其實我係第二度都已經起左 n 個 blog，不過我諗 mysinablog 會比較適合我開這個 blog 的用意︰

我發覺 mysinablog 的功能比 Y!blog 和 blogger.com 多，睇黎我要試真 d 先得。

查實我在某地方另外有一個 blog，那個 blog 就名符其實係我的 diary，只有我的現實世界好友才有機會瀏覽。由於內容往往涉及工作上的是非，所以我唔敢o係呢度人流咁多的地方亂咁寫了，費事有同事唔覺意睇到我講人壞話後，就有人向我報復啦。