當你去到任何一間美容院，遇到推銷的情況，而你原本沒有打算 join，你通常如何回答？
「我無錢呀，俾唔起，已經山窮水盡。」
No！No！No！
「我不需要。」(並且顯得沒有興趣)
對啦！
我以前都經常咁答「無錢」 (咁我的確真係無錢)，但前晚同朋友傾左幾個鐘頭電話後，便明白到咁答都係會死架！正確的答案只有一個「不需要。」，並且不要顯露對服務有任何的興趣。
當然稍有良心的 sales 便不會再纒下去，可是我卻偏偏多次遇著無良黑心的 sales，於是荷包乾塘，好慘。
因為，當你答「俾唔起」都好，推銷員都會想盡辦法幫你把 payment 拆散，例如佢地會話把費用分 36 期，那麼每月只需供幾百元。
或者，他們會推一個較平的 package，然後便說可以買呢個 plan。
如果客人有興趣既話，或者在推銷過程裡，覺得自己「真的很有需要」去買這個服務，於是便會付錢，於是 sales 便達到最終的目的。
的確經過受訓的 sales，都很懂得捕捉到客人的心理，令到客人都覺得自己「真的很有需要」改善自己的情況，及那公司「真的幫到自己」，並且只有那公司才可以幫到自己。
所以，如果真的不想 join 任何服務，最好的方法便是「便宜莫貪」，只有這樣便沒有機會自己大額消費。
所以，什麼免費試做、免費諮詢服務等全都不要去。除非閣下對某公司的服務有興趣。
另外都多點去討論區看文，因為間中都會有人說被某某公司 hardsell 或受騙的事件，看完後大可 blacklist 那些公司。
說回正題，上週中我又再次被 hardsell...
話說在今年三月中的時候，我經不起試練，而被成功 hardsell 而 join 了 Phyxxxxx (簡稱 P 記) 的私人教練 (簡稱PT) 課程，價錢是兩萬元/36 堂左右。
雖然在有些有錢人眼中，呢兩萬元只係濕濕碎，但對於我呢個窮 OL 黎講，就真係好肉赤！T___T
之後這兩個月以來，我每周都有兩至三日，都會到 P 記上 PT，有時會上一小時，有時是 1.5 小時，有時是 2 小時。有時是 Trainer A，有時是 B 教我做健身和肌肉訓練。
雖然有些幾個月無見的朋友，近日再見面時都發現我瘦了，肩膀疼痛的確改善了。不過我並沒打算再加堂了。
上週中，Trainer A 帶著我做了幾個器械後，Trainer B 便替我做肩膀按摩。
Trainer B 的手勢確是不錯，按摩完後肌肉真的放鬆了。
不過 Trainer B 便說：「妳的情況真係好嚴重喎，d 肌肉好梗好硬呀，d 肌肉就黎壞死啦。」
Bel Bel：「咁點算呀？」
Trainer B：「以後我幫你捏番鬆佢囉。」
然後 Trainer B 便說：「跟我過黎啦。」
他帶我入去一間隔音的玻璃房，門本身沒有鎖。
之後 Trainer B 便列出一個健身 plan 給我，說之後的上堂的程序是：頭一節上 Stretching (肌肉按摩和放鬆)，第二節上 Weight Training (肌肉訓練)。過了一段時間，便再加插 Fat Burn 的運動。
然後 Trainer A 便推門入房，便說：「我們都好希望改善妳的身體狀況，以妳的情況真係需要大攪。但係我地初頭無 plan 過原來妳仲需要做 Stretching，不過妳再要預多些 budget，大約係三萬零蚊度啦...」
Bel Bel：「之前兩萬零，而家三萬零，咁咪六萬蚊囉？我無錢俾喎！」
Trainer A：「如果妳再唔攪好自己身體，驚你第時肩周炎，肩周炎最嚴重係連著衫都著唔到。妳做文職好罩忌，驚你第時真係痛到返唔到工呀。」
Trainer A 續說：「如果攪 36 個月免息分期，每個月都係俾多千零蚊左右啦。妳真係要趁後生攪番好個身體呀。」
(我心想，我都想攪番好個身體，但我真係無錢，我窮到好多朋友都睇唔起我，我連想讀多個 degree/搵男朋友/結婚/買樓都無錢，如果真係會痛死咪由得我痛死囉，我根本都無錢去醫！)
Bel Bel：「我真係無錢俾，我每個月得番幾百蚊自己用，週末仲要返 part-time 幫補。」
之後 Trainer A 說：「我唔信，無可能！」
Bel Bel：「我仲要俾家用，還錢俾銀行，d 咭碌爆晒，碌無可碌，真係無錢剩。」
然後，Trainer A 說：「我都係爭銀行好多錢，我地都係同時天涯淪落人，我仲爭人廿幾萬，又要供車，我由 C 記過來呢度做之前，已經有半年無工做...」
Trainer B 說：「我都係每個月還俾銀行 6 千蚊... 我地幾個都係同一類人。」
(原來你 d hardsell 手法，係由 C 記學番黎既，唔怪得之啦！你有得供車，我就俾錢你間公司幫你去供車，咁我養埋你好唔好？痴線！)
Trainer A 又說：「我識得好多銀行財務公司朋友，可以幫妳做一筆清，妳而家究竟每個月要還俾銀行幾多錢？」
(真係咁好心幫我搵財務公司借一筆清？還是我做完一筆清就有錢剩，咁就可以繼續俾錢你公司，咁你就繼續收佣。)
Trainer A 說：「嗱，Bel Bel 妳做左一筆清之後，都應該仲有錢剩，就無而家咁辛苦，咁你就拿多千零蚊上 PT，剩番既錢就儲起佢。」
(我心諗，如果我做到一筆清，剩低 d 錢都唔再上 PT 啦。)
當時我真係唔醒水，仲講左俾佢地聽我的財政狀況，於是便被人入到位繼續 sell。
Bel Bel：「唔怪得你地咁落力去 sell 我，原來你地都爭人錢。咁我而家剩番幾多堂呀？」
Trainer B 居然說：「你每次簽名個表，其實唔準架，我要打番去 center 度問。其實到你就黎上晒既時候，我地會幫你對數的...」
(下？有無攪錯？乜我每次簽名那個表，都做唔到紀錄咩？)
好彩，當時健身中心就黎要關門，所以他們兩個終於放我走。佢地 sell 左我半粒鐘呀頂佢！！！咁又蝕左半堂呀賤人！
但係 Trainer B 臨走時同我講：「嗱，Bel Bel 你明日就好打電話去問銀行，如果提早還款既話係幾多錢，下堂你俾個 list 我，等我幫你去問朋友...」
(結果我梗係無去問銀行啦，睬佢都傻既！)
本來，我仲有十堂左右未上，而又 book 左昨日週六早上去上堂，但我和朋友商量後，都覺得暫時不要再去上堂 (又再被 sell 多一次)，於是我也扮病 cancel 了昨日的堂。
這裡很感謝那位朋友肯同我傾了三小時電話。的確，我朋友很少，很多人都看不起我，都不想和我做朋友。而且，她是第一個說叫我打電話給她傾訴，肯花時間了解事情的來龍去脈，她的分析和意見應該幫到我一點，而且感到原來她一直都在我身邊。
其實，我好想澄清，我真係平時絕對無亂洗錢，只係我轉數太慢，又好容易被人入到位被 hardsell，所以至攪到而家咁慘。
我希望各位看完篇文後，可以筆下留情，求求你們不要再罵我了。我真係承受不到別人的閒言閒語、批評及責罵。我只是想抒發自己的情緒，求求各位可以放過我好唔好？
就算過去我真係做錯了，也請你們不要罵我了。況且，我真係無亂洗錢，只是還未學懂不會被人哄騙而覺得「有需要」買了很貴的服務。
你知道嗎？幾日前我在 Facebook 講了我的情況，換來的卻是一堆謾罵，我為了這堆不實的謾罵，令到我整天都無法集中精神工作，而且還哭了。
我真的承受不了。我已決定以後不再去上 PT 的 centre，餘下的堂數我唔再上了，我知道我實在無法抵受「兩個夾一個」的 hardsell，我真的怕了！各位不要勸我再上了。我寧願蝕錢也不要再俾機會別人 sell 我了。
各位，這篇文真係好長，我也打了這篇文三小時，很感謝各位耐心地看完。
我只是希望把我的經歷分享而已，只是希望各位不要中招，而不是一個又一個的責備及攻擊，謝謝各位筆下留情！
另外，如果各位也覺得這篇文也幫到人不去上當的話，也請幫忙推一推。
謝謝各位！
留言列表
健康纖體 (6)
