小妹期待的港甲榜首大戰,終於在今日下午四時開波喇。雖然小妹並不是任何一隊港甲隊伍的 fans,不過呢場波我都希望南華會有好表現既,因為在這場比賽前,聯賽首名的傑志拋離南華七分之多,如果南華能在今場迫和甚至嬴埋,就可以把彼此的分數拉近,在下半季的聯賽戰情將會更緊湊。

南華在賽前很認真地檢討上仗對流浪大敗的原因,和針對傑志的踢法作出部署。他們在今仗放棄常規的 4-4-2 陣式,而改以 4-5-1 陣式出擊,結果南華在下半場憑 T史高斯和郭建邦的入球,打破了傑志連績七戰七勝的紀錄。南華的 fans 見到愛隊今仗的表現咁好就更加開心啦,坐在第 14 區的 fans 都穿上南華的打氣 T-shirt,一起吶喊打氣啦!雖然今日是賽馬日,不過今場波的入場觀眾有 3,560 人,仲多過兩星期前愉園對南華的賽事。當南華入波個陣,所有南華的球迷一起狂呼「好野!」,「Yeah!」,這種熱血沸騰感覺,叫我興奮得難以用筆墨來形容!

小妹見傑志近七戰全勝,賽前仲以為呢場波的比賽場面會係一面倒添,點知係岩岩相反,南華比我想像中表現得好,相反傑志可能被南華搶了中場,拍甩他們很多球,他們的威力似乎無法發揮。上半場雖然悶左少少,不過下半場隨著南華換入 T 史高斯和黃鎮宇,還有傑志的高文被趕出場,南華的氣勢又返晒黎喇!T 史高斯入左黎無耐就射破傑志的龍門, 1 比 0 了!到了 80 多分鐘,郭建邦在門前頂入 2 比 0。真是高興!恭喜晒南華嬴波!

張春暉的表現都係咁好,救了許多險球,今日仲獲得十月份最佳球員的獎狀添,加油呀。
迪天奴今日發揮唔到他的制空威力,他既俾人 mark 死左,而且兩側無乜支援和輸送俾到佢。
「香港亨利」鄭少偉幾勤力,不過身型太單薄,技術上仍需磨練。

今日見到藝人阮兆祥和林曉峰入場睇波,唔知佢地坐係邊呢?

另外在中場休息時間,舉行了「最具創意球迷服裝獎」選舉。其實有位南華 fans 戴左一頭紅色假髮,仲有一位傑志 fans 扮到成個藍精靈咁,都幾突出丫,不過點解拿冠軍的卻係著露臍裝的女球迷架 (雖然她都幾靚女)?

黎緊的星期,將會上演港甲上半季最後一輪賽事,有興趣睇港甲的球迷記得捧場啦!

P.S. 黎緊星期四晚在旺角場會有南華對聯華紅牛的賽事,我想去睇呀,不過應該去唔到喇 ...... >.<


Bel Bel 發表在 痞客邦 留言(0) 人氣()

今日睇蘋果日報,看見這件趣聞,有點意見想發表下。

以下文章摘取自 2006 年 11 月 3 日 蘋果日報港聞版:

「 誰 付 了 誰 」 的 故 事 是 這 樣 開 始 的 , 身 在 美 國 的 女 子 Todasee 在 網 上 認 識 了 35 歲 男 工 程 師 David Wong 。 去 年 底 Todasee 回 港 , 兩 人 相 約 見 面 吃 飯 。 可 惜 男 無 心 女 無 意 未 能 繼 續 發 展 , 但 兩 人 的 轇 轕 , 這 時 才 開 始 。 Todasee 近 日 在 網 上 聲 討 David , 指 他 突 然 追 收 吃 飯 費 用 , 要 求 她 支 付 吃 了 一 碗 的 價 錢 盛 惠 55 元 , 「 當 時 我 話 要 自 己 畀 錢 , 但 佢 埋 單 。 」


各 有 不 同 版 本

Todasee 稱 , 其 實 吃 飯 後 數 月 , David 「 一 日 打 十 幾 次 電 話 畀 我 , 我 唔 想 同 佢 去 街 , 跟 住 佢 問 我 番 55 蚊 。 」 她 又 說 , David 不 收 現 金 或 支 票 , 要 她 把 錢 存 入 其 手 機 賬 戶 以 支 付 電 話 費 , 「 好 彩 唔 係 同 佢 拍 拖 , 唔 係 有 日 佢 叫 我 畀 番 感 情 佢 。 」 Todasee 留 言 後 , 數 以 百 計 網 友 狠 批 David 小 器 又 cheap , Todasee 獲 群 眾 同 情 , 更 食 住 上 披 露 事 件 「 下 集 」 , 公 開 一 個 David 私 下 給 她 的 短 訊 , 內 容 是 David 咒 她 愈 來 愈 醜 及 撞 機 。 一 時 間 David 成 為 「 賤 男 」 , 成 為 網 民 公 敵 。
戲 劇 性 的 是 , 男 主 角 前 日 突 然 出 現 在 網 上 反 駁 Todasee 。 他 的 版 本 是 , 近 日 他 才 在 網 上 再 聯 絡 Todasee , 而 非 不 斷 致 電 給 她 。 由 於 Todasee 表 明 不 視 他 為 朋 友 , 他 才 追 回 食 錢 。
他 又 指 女 方 修 改 了 他 的 訊 息 才 公 開 , 明 顯 有 意 屈 他 , 「 我 認 為 我 有 權 向 一 位 只 視 我 為 陌 路 人 的 人 追 收 吃 飯 錢 。 」

上述事件的男主角可謂是男人之中的渣滓。兩日的上班交通費都用去 $55 啦!$55的一碗麵,相信只不過是普通餐廳或 Citysuper foodcourt 的價錢吧,又不是請她吃千多元的情人節套餐,難通一名工程師掙 $55 是那麼艱難嗎?

他為小小金錢便這麼計較,相信他也會十分吝嗇對伴侶感情的付出。姊妹們,你們願意嫁給這樣的男人嗎?難怪他己屆 35 歲還未找到另一半了。

其實為什麼別人找到另一半,而有些人卻找不到?除了緣份未到,是否要檢討下自己的缺點呢?

還有,小妹認為姊妹們約會初相識的男仕吃飯,就像跟女性朋友吃飯般,各自各付錢吧,以免日後發生不必要的糾葛。

Bel Bel 發表在 痞客邦 留言(0) 人氣()

極之無奈的一場波...... 阿仙奴對莫斯科中央陸軍呀~~~~ 阿仙奴咁多次射門,差唔多次次都入..... 唔係,應該話係差少少先入!

其實阿仙奴在上半場的形勢都算係壓倒性,他們係咁攻,陸軍只可以係咁守住。最無奈係在臨完上半場前,亨利把個波橫傳俾路斯基,他面對空門,點知都係踢番俾個龍門.......

不過呢隊陸軍的部署及防守真係值得一讚既,他們在中場體力化既截擊,令阿仙奴唔可以好流暢地做到攻勢,下半場體力不繼,攻勢開始冇咁入肉。

阿仙奴今日真係撞邪......

(係咪因為我買左條 4x1: 阿仙奴 W x 里昂 W x 皇馬 W x AC W, 所以阿仙奴嬴唔到呢? 真係撞邪...... emoticon )

Bel Bel 發表在 痞客邦 留言(0) 人氣()

趁小妹有少少時間,講下歐聯 A 組的形勢先。

A 組的球隊同踢了四場波,截至今日為止,車路士以 10 分排榜首,雲達不萊梅以 7 分排第二,而巴塞隆拿由於未能在主場嬴車路士,所以四戰只得 5 分排第三位,包尾的索菲亞利夫斯基四戰全負得 0 分。

在今個月的 22 日,雲達將會在主場迎戰車仔,而巴塞將會作客利夫斯基。另外在下個月的 5 日,巴塞和車仔分別會在主場跟雲達和利夫斯基對碰。

小妹預計車仔會以六戰不敗的佳績首名出線,以車仔的防守能力,相信去到雲達主場至少都取得 1 分 (希望車仔唔會俾我「燈」到啦!),返到主場也食硬利夫斯基喇掛!

現在巴塞只得 5 分,很多球迷或會擔心他們會出局。如果雲達下場嬴了車仔,睇黎巴塞可以疊埋心水踢歐協,不過小妹認為雲達嬴車仔的機會不大,除非車仔有心「整走」巴塞。相信巴塞會大炒利夫斯基,不過巴塞在最後一場分組賽對雲達,巴塞真的非勝不可了。

Bel Bel 發表在 痞客邦 留言(0) 人氣()

各位忠實的球迷睇見呢個標題,唔知有無同感呢?

眾所周知,由於歐洲地區現正實施冬令時間,所以冬春兩季的足球賽事都比夏秋季推遲一小時,那麼香港的球迷如果週中想收看歐聯的賽事,就要記得把鬧鐘調到 3:30 - 3:45 a.m. 左右呀。

不過當歐聯賽事完場後,時間約為 5:30 a.m.,對於我這些最遲要在 6:30 a.m. 起床梳洗的上班族來說,就真的唔知去睡覺好?還是唔睡好呢?如果我選擇睡一會的話,也許會睡過頭,因為我是那種即使較了鬧鐘也不會被吵醒的人!如果不睡的話,卻不夠時間「叉叉電」,加上我一定要趕及八點左右開出的公司巴士上班,所以現在的比賽時間確是有點叫我煩惱。

Bel Bel 發表在 痞客邦 留言(0) 人氣()

Picture

在我講南華對流浪呢場波之前,俾我講小小關於早場的賽事先,就係公民對愉園。

愉園的後防可以用「豆腐」兩個字黎形容,如果唔係公民球員面對空門都唔識入波既話,愉園分分鐘倒輸都唔奇。呢場波愉園上半場領先一球,最終以一比零完場。

不過南華今日的對手流浪就唔同 lu,流浪的後防線穩固得多了,以南華的進攻模式,想入波真係唔係咁易......

結果南華輸了零比三俾流浪。

好多球迷散場時都話,可能羅生在今場波無俾獎金,或者班球員拿上場的嬴波獎金o黎去 wet,所以今場南華球員唔多願郁,所以輸波,呢句話小妹不敢苟同了。不過南華的 fans 都對其愛隊的表現相當失望,因為他們喜歡南華,是因為他們那「打不死」的拼勁,比賽落後時會拼命進攻,努力爭取入球。小妹見到南華當落後到二比零時,他們才如夢初醒,不過看來太遲了。

上半場基本上流浪控制戰局,南華的射門次數寥寥可數。另外南華都幾倚賴角球和頭鎚攻門 (印象中仲有幾隊本地球隊都係咁),進攻瓣數不多,好像打下小組滲入、穩守突擊等都沒有做到。還有迪天奴經常被對方後防盯死,後防轉身和回防又慢,不過南華龍門張春輝的表現都算唔錯,否則可能唔只輸三球。

仲有今日才發現馮嘉奇都幾好波,控球能力不俗,見到他多番在左路引球推入禁區助攻,都幫到球隊製造攻勢。高梵跑得好快,南華後防根本 mark 唔住。所以流浪嬴波呢個賽果都好合理。

另一方面,真係要讚下南華工作人員的用心和努力。今場他們在場內除了派發加入球迷會的表格外,還派了紅色氣球棒給球迷製造「紅海」。可是似乎只有坐在近雀仔街那邊的南華 fans 才舉起紅色氣球棒,坐在另一邊的部分內歛的南華 fans 都把氣球收起。話雖如此,在場的南華的 fans 還是比其他球隊多,也許會聽到他們在愛隊輸波後喝倒彩,或者輸打嬴要,不過小妹卻覺得他們只是「愛之切,責之切」,球迷有意見表達總比沉默的好。

Bel Bel 發表在 痞客邦 留言(0) 人氣()

趁我岩岩食完lunch,等我無聊下啦。

好想冬天快點來臨呀,除了可以穿厚厚的衣服,遮掩我身上的肥膏之外,還可抵禦公司寒冷的空調。而且我很喜歡戴頸巾,穿長靴等。

呢排好唔開心呀,睇完肥田囍事,聽完球彩俱樂部阿鵬強尼阿聲等講笑後都唔識笑......

好唔鍾意新環境的生活呀,因為我而家日日都要倒塔咁早起身......

突然間好掛住以前同我一齊出席孫耀威 function 的好朋友呀。講真我好耐都無識到好似她們咁close,咁真誠的好朋友。

孫耀威幾時會出返唱片呀?好想聽下他的新歌啊。

其實我的生活都幾空虛,工作->返屋企/返學->睇電視/寫blog->訓覺
日日如是。

我開心唔開心o既時候,邊個肯聽下我講野?

Bel Bel 發表在 痞客邦 留言(0) 人氣()

今次被小露茜「踢」中,都係我第一次俾人「踢」。其實「踢」來「踢」去都幾好玩,既可刺激自己的思維,又可以令 tag 友加深一點對彼此的了解。今次我寫的是愛 tag,都唔係太難寫丫~

1 老點我的人: 小露茜
2 寫出填寫日期吧: 2006-10-22(11:26am)
3 愛的食物: 基本上所有日本料理都鍾意食
4 愛的音樂: 中文流行曲, soundtracks
5 愛的地方: 自己的房間~ :P
6 愛的口頭禪: 話時話......
7 愛的顏色: 藍,綠
8 愛的偶像: 羅拔圖巴治奧,孫耀威
9 愛的甜食: 朱古力慕絲
10 愛的節目: 所有足球賽事
11 愛的書籍: With (其中一本時裝美容雜誌)
12 愛的店: 時裝店,化妝專櫃店
13 愛的作家: 沒有
14 愛的唱作人: ZARD 的主音 Izumi Sakai
15 愛的國家: 日本
16 愛的座右銘: nothing is impossible!
17 愛的習慣: 寫 blog
18 愛的腔調: Really?
19 愛的是受還是攻: 雙向
20 愛的星座: 處女座 (梗係講番自己的星座~)
21 愛的休閒: 睇 blog,睇波
22 愛的個性: 可愛~ :P
23 愛的女人: 我阿媽,我自己
24 愛的男人: 我老豆,我未來男友/老公
25 愛的公仔: Forever Friends
26 愛的動作: 直豎拇指
27 愛係點的: 甜酸苦辣乜都齊
28 愛人地點對你: 如我愛他們一樣地愛我
29 愛的飲品: 抹茶
30 愛的感覺: 暖暖的,甜甜的
31 愛的類型: 成熟穩重的單身「中男」
32 愛的朋友: 咁你當唔當我係你的朋友先?
33 愛的承諾: 我們永遠在一起
35 愛的運動: Gym,足球
36 愛的人: 同第 23 & 24 點
37 愛的歌詞: 約定
38 愛的收藏品: 沒有
39 愛的工作: 唱歌仔,影下相,寫下o野
40 愛的服飾: 雪紡質地的裙子
41 愛的牌子: DHC,Kose,Nike
42 愛的 subject: 唱歌堂,攝影堂,扮靚堂
43 愛的結果: 永結同心
44 愛的勇氣: 要面對當心愛的「他」要離開自己
45 愛的時間: 無論係我自己一條友或者和朋友/家人一齊都喜歡
46 愛的文章: 感動人心的文章
47 愛的季節: 秋
48 愛的節日: 復活節
49 愛的代價: 浪費青春在「不對」的男人身上
50 愛的回憶: 好慘......
51 愛的獨白: 愛你一萬年
52 愛的最苦: 愛一個永遠不會屬於自己的人

 

Bel Bel 發表在 痞客邦 留言(0) 人氣()

Picture

今日去o左旺角大球場,睇o左兩場幾精彩的本地甲組賽事︰早場的流浪對聯華紅牛,及尾場的南華對愉園。流浪以 2:1 擊敗聯華紅牛,而南華以 3:1 大勝愉園。

正如 Johnny 在留言講過,在旺角場睇波比起在香港大球場睇,是兩種截然不同的感覺。我覺得在旺角場睇波,比在香港大球場有多一份親切感,可能係因為球場細啦,跟觀眾席的距離很近,再加上旺角場是沒有獨立座位的,觀眾與觀眾間坐得也很近。還有的是入場的人數也比我估計的多許多啦,球場兩旁的座位可算是座無虛席。我在中場休息時離開座位一會,當回到自己的座位時,卻發覺我原本的座位被別人佔了。

另外門票只售 $60,便可一併看兩場賽事, 好抵睇。

還有愉園和流浪的球迷會,都在場內分別銷售紀念特刊和球會波衫。愉園也同時招收新會員。

我覺得流浪的實力稍比聯華佳,不過流浪的門前把握能力似乎需要改善,球員面對空門也不能把球送入網,坐在我附近的阿伯 fans 們不斷講粗口問候球員,還大聲疾呼,教他們該怎樣攻門呢!

聽講有線足球評述員馮嘉奇都是流浪的球員,不過點解我見唔到「馮奇」出場既?講真丫,呢場波我唔係咁集中精神地睇,因為我蠢囉,無帶雨傘或太陽帽,而今午陽光很普照,幾乎把我溶掉...... emoticon

Picture

幸好到了尾場的南華對愉園,陽光比較沒有那麼猛烈,還吹了微微涼風,在呢種天氣下睇波都幾舒服。

原來入場的觀眾大多都是南華的球迷,看見南華入球時,觀眾的熱烈反應便會明白。

點解許多人都說南華對愉園是一場大戰呢?在 forum 有網友話因為南華好多年都沒有嬴過愉園喎......

今日南華真係非常「好波」!開波後三分鐘,南華的史高斯的頭鎚頂入愉園的龍門,領先 1 比 0。可能因為愉園的後衛們身材較矮小,睇黎無法抵抗南華的高空攻勢,十多分鐘後南華的「大猩猩」迪天奴頂入角球,2 比 0 啦~!不久,又係史高斯的勁射,為球隊射成 3 比 0。

Picture

真係估唔到咁早就奠定勝局!南華可謂盡顯霸氣,而愉園真係「無得打」,上半場基本上南華控制著戰局,不過之後他們再沒有繼續數糊,我就覺得無之前個十幾分鐘咁好睇喇。也許部分球迷都覺得這場波大局已定,所以他們在中場時間便離場了。

下半場愉園換入「豪豬」蔣世豪及兩位球員,之後漸漸地做番主動,可惜都無功而還。不過到了八十分鐘左右,愉園終於破蛋了,可是仍未能平反敗局。

現場的氣氛真係非常好,南華的入球,令到在場每個 fans 都一起歡呼,簡直係熱血沸騰!不過如果大家可以好似外地聯賽的主場咁,可以唱下會歌就更加「正」喇~!如果有些資深的南華的 fans 睇到我呢篇文章,會否考慮下帶頭唱下會歌?(咪住...... 乜原來愉園今日名義上係主場黎o架?失敬失敬。唔怪得唔見南華的 fans 打鑼打鼓......反而看見對面的愉園 fans 既攤開會旗又打著鼓打氣啦。)

我真係有少少唔明點解,點解入場的南華 fans 比愉園,甚至比其他本地球隊多呢?雖然 80 年代或以後出生的年青人,也許不太認識本地足球,但係 70 年代或以前出生的球迷,我估他們都各自支持不同的球隊吧,那麼除了南華外其他球隊的 fans 呢?難道他們也不再入場睇波?

 

Bel Bel 發表在 痞客邦 留言(0) 人氣()

車路士和巴塞隆拿可謂冤家路窄,連績三年的歐聯賽事都會碰頭。因為兩位正副門將,施治和古迪仙尼都受傷,所以許多球迷事前都睇淡車路士勝出的機會。不過憑著車路士較佳的整體發揮,與及越來越好波的杜奧巴的入球,在史丹福橋球場氣走巴塞隆拿,成功為上屆歐聯十六強被巴塞隆拿擯出局的一箭之仇!

o係呢場波,真係不得不讚近態大勇的杜奧巴!前o個一兩年,我成日叫佢做「豬油包」,因為他在聯賽經常錯失入球的機會,所以經常令車仔開出 1:0 的「黃金比數」。剛在上個月車仔對利記,都係杜奧巴一個半車身抽射破網,那場波開始我才決定唔再叫佢做「豬油包」!今場對巴塞,杜奧巴接應艾殊利高爾傳中,擺脫了佩奧爾的防守,勁射入網。以杜奧巴的強勁的突破能力及不俗的頭槌入球能力,唔怪得佢經常都踢正選啦。

仲有第三門將希拉里奧的表現很穩定,無乜點犯錯,予人驚喜。車仔的球迷大可放心了。

馬基里尼和艾辛搶嬴晒中場。後防線很穩陣,而且成功鉗制細哨、美斯和古利的攻勢。

至於舒夫真高,我看見他在下半場的半單刀後,覺得以往的他漸漸回來了。只要他下定「開齋」的決心,相信好快便會睇到他的世界波。

Bel Bel 發表在 痞客邦 留言(0) 人氣()

上星期五,小妹的電腦拿去電腦公司維修了。整個週末週日也沒法上網,總是覺得不舒服。emoticon

為左幫補電腦的維修費,小妹又要努力搵下外快了。不過我未能在電腦看到賠率,就好似唔識買波咁。叫我去馬會度填「飛仔」,不如叫我返屋企訓覺好過。emoticon 因為我覺得馬會的投注彩票唔夠 user friendly,想買多過三關便要拿另一張較大的票,為什麼馬會不把彩票的 size 統一起來呢?

沒有電腦的日子,總有點跟外面的世界斷絕聯繫咁,人地在 forum 度講緊乜野我又睇唔到......仲有唔知點解呢幾日好想寫 blog,想寫又無得寫的感覺確是難受。

另外今晚的心水係查爾頓的下盤。無時間解釋了,因為又夠鐘開工。

Bel Bel 發表在 痞客邦 留言(0) 人氣()

我們真的可以從一位女子的打扮便看得出她是否已有伴侶?為什麼當小妹稍為化下妝, 穿得比平日好一點,便會被身邊的同事或家人問及,我是否約了男朋友?

其實我昨日去影相,所以才打扮得跟平日上班或週末日牛記冚記的不同。不過媽媽卻居然問我最近是否拍拖!事實上最近沒有什麼哥兒們晚上打電話給我,只是上星期約了兩位異性朋友吃午飯,咁你o地話我有冇男朋友?

除了工作上所需,有時扮下靚,為自己換個 style,也是令自己心情變好,增加自信的好方法,更何況愛美是女人的天性啊!姊妹們該隨著自己的喜好而作自己喜歡的裝扮嘛,而不是只是為了討好愛人呢。

所以當見到身邊的朋友的打扮衣著跟平日的不同,但又並非參加宴會,別大驚小怪呀。

(P.S. 查實小妹好怕被人問及,我已否有男友/已婚的問題。原因?請待下回分解。)

Bel Bel 發表在 痞客邦 留言(0) 人氣()

今晚的亞洲盃外圍賽,香港作客令人失望地吞了卡塔爾兩隻光蛋,再加上烏茲別克於同日作客 4:0 擊敗孟加拉,看來香港隊無機會出線了。emoticon

另外今晚的歐洲國家盃外圍賽的賽果都幾正路,大多傳統強隊都嬴到波。不過英格蘭輸左俾克羅地亞,在 forum 見到好多英格蘭躉都好失望呀。我都睇左呢場波一陣,覺得克羅地亞佔盡優勢喎。同埋英格蘭入的 own goal 真係好肉酸,加利仔把球回傳俾羅賓遜,羅賓遜本來想把球踢走,怎知踢了空氣,皮球就係咁 "look" 左入網。@_@

另一場直播賽事,波蘭對葡萄牙的賽果都幾爆冷下,比數是波蘭 2:1 嬴葡萄牙。施莫拉域為波蘭射入的兩球真係好靚。呢場波葡萄牙後防都俾左好多機會對方破門,米基爾包左 offside,裝越位失敗下又俾施莫拉域入第二球。其實波蘭入左兩球波之後,他們的防守都幾嚴密,葡萄牙都無乜機會埋門,就算 C 朗拿度在邊線斬波到底線,在遠柱位置的前鋒都 follow 唔到。不過在下半場補時階段,葡萄牙的紐奴高美斯接應森馬奧的傳球,終於追成 2:1。

(仲有既係好高興聽到丁偉傑評述波蘭對葡萄牙的賽事)

Bel Bel 發表在 痞客邦 留言(0) 人氣()

Picture

昨日,是我有生以來第一次入場觀看香港甲組聯賽的賽事,就是南華對香雪晨曦。

其實在約一個月前,我偶爾收看《星期二檔案》,講述和富大埔呢支由許多業餘球員組成的升班球隊。看完這集專輯後,不知為何突然想去看香港甲組的比賽,於是趁昨日有空,便獨個兒去香港大球場睇南華對香雪晨曦。

我約三點四十分左右進場,當時和富大埔對公民的比賽還未完結。和富大埔在比賽末段面對公民隊的狂攻都頂得住,最終以 0 比 0 完場。恭喜大埔拿得升班以來的第一分。

昨日進場睇波的球迷比想像中多呢!原來昨日入場的球迷共有三千四百六十一人,是今季開季以來的新高。球迷多集中坐在西看台下層的座位,其中以支持南華的觀眾佔大多數。有些球迷看見南華的防守做得差,經常把皮球橫傳,而且多次「走甩」晨曦的前鋒,便破口大罵;當南華在下半場追回一球時,許多球迷都站起來拍掌歡呼。誰說香港的球迷不熱情?

不過我覺得上半場南華的進攻不夠入肉呢,而且間唔中裝下越位,反而晨曦卻「襟住黎砌」,上半場晨曦先入一球,以一比零領先上半場。下半場早段,晨曦射罰球中柱,然後有球員執雞入網,擴大比數至二比零。

雖然晨曦領先二比零,但那時我總覺得南華會追成較近的比數,甚至迫和。果然晨曦在入左兩球後攻勢減少了,相反南華並沒有放棄,加上在眾多南華 fans 的吶喊打氣下,真的追成二比二平手。

講真兩隊都沒有像巴塞、阿仙奴等美妙的地面推進及小組入滲戰術,而是踢法比較高 Q 大棍,不過他們的對碰,卻一同譜出一場精彩緊湊的比賽,看得觀眾如痴如醉。加上南華那打不死而永不放棄的精神,難怪至今仍然有部分追隨多年的球迷繼續支持。

願入場看香港甲組比賽的球迷人數能再創另一新高!

Bel Bel 發表在 痞客邦 留言(0) 人氣()

早在數個月前,我偶爾路過他的 blog,自此之後,我一有空時便必定追看他的 blog,因為這個 blog 的內容引起我的共嗚,而他對她的痴心也令我很感動。

說起別人的 blog,也許有讀者覺得我該把這篇文章放在《愛上他的 blog》的分類裡,不過我從他的字裡行間中,感到他並不太願意把他對她的感情公諸於世。而這篇文章,我並不是要介紹的 blog,而是想道出我對他的 blog 的一點感覺。

「她」不是他的女朋友或妻子,而只是他的好朋友。他很清楚他永遠也不會得到她,因為她已經有一位很好的男朋友。可是他沒有因此放棄對她的愛,在她 online 的時候,他會向她問好,不求結果,只是一心一意給她快樂。

他曾答應自己,不要經常去打擾她。每隔一段時間,他便會在 blog 訴說對她的思念。他要表達對她的愛,也只有藉著那個 blog。

在許多人的眼中,這個男人真傻,不停地為一個永遠也不屬於他的女子付出。但是,愛情這東西又怎能用常理去解釋呢?

很多時明知和對方沒有結果,但是偏偏不能自拔,反而愛得越來越深,最後令自己身受重傷。許多的三角關係就是因為「不能自拔」而發生。

這麼專情的男人,相信在香港難以覓到了。如果閣下被一個這樣的男人愛上,而沒有其他伴侶的話,請好好珍惜他。

其實我也希望他終有一天會修成正果。

我也真是傻了......

Bel Bel 發表在 痞客邦 留言(0) 人氣()

本來剛過去的長假期,我打算睇多幾場波,做多點運動,在這兒寫多點文章,不過假期結束後,我發覺我想做的事卻沒有做。emoticon

其實我有好多o野想寫,成日行行下街,做做下o野,諗到好多o野好想寫低,不過返到屋企就累到扒o係床度,當然係乜都無做到。emoticon

今晚難得唔駛開 OT,就繼續寫我的球彩睇波 party 記事。不過寫下寫下又寫左成兩個鐘!唔係講笑,我真係寫左成兩個鐘!因為自從出來社會工作後,我便很少以中文寫作了,而且近一兩年我的工餘時間,差不多已經絕跡於 icq 的世界,只是在公司開 msn 跟同事和朋友傾兩句,我的中文打字速度退步了許多呢。

今日睇球彩俱樂部,一班主持講開香港足球的盛衰,所得出的結論是除左球會資金不足,政府及許多巿民並不很支持本地足球,而出現青黃不接的情況,因為許多小朋友除左主持所講有許多足球以外的娛樂,而且香港球員薪酬低 (文員的人工可能比他們多),難以吸引有潛質的下一代成為職業球員。我認為香港人普遍都生活繁忙,青少年既要應付繁重的學業,要花多點時間練好波的確很難,這也是香港近年足球水準下降的原因。

最近喜聞 BMA 唱片公司老闆羅傑承,出錢又出力地攪好南華這隊老牌香港甲組球隊。希望三五七年後,香港的足球可以復甦起來。

如我想攪好呢個 blog,腦袋固然重要,而時間也是一個很重要的因素呢。但願每天下班也不用 OT,讓我有空上來吹吹肺話。

(做乜我講講下寫 blog 一點感想,但係又無喇喇又講波?哈!)

Bel Bel 發表在 痞客邦 留言(0) 人氣()

唔好意思,因為上個月工作好忙,無乜時間 update 番上個月在鑽石山廣場的「球彩睇波大聯盟 」添。=.=

是次活動負責的球彩台主持包括︰阿鵬、阿占、張國強 (KK)、Rita 和依雯等。講真如果呢個 show 無左阿鵬和 KK,咁一定無咁好玩。成個球彩台最叻攪氣氛始終都係佢地兩位。不過如果 Wendy 都有出現既話,我諗一定會更好笑、更好玩。

呢晚上述五位主持和一班現場觀眾,一齊睇車路士對利物浦的比賽。阿占、Rita 和依雯都穿上車路士的球衣。阿鵬身為忠實的利記粉絲,居然無著利記波衫,感覺好似無左個種「撐場」 feel。KK 見到阿鵬的愛隊無主持撐,咪唯有支持下利記。

睇波 show 一開始,阿鵬就四圍咁派錢俾觀眾。在之前的 post 講過,他都有派錢俾我呢,多謝晒!:D 而 KK、阿占和 Rita 便派月餅給觀眾。

接著阿鵬和阿占先為以後的遊戲環節做 warm up,就係佢o地鬥快把桌上的月餅食完。在現場睇見佢o地食月餅個樣,包你笑到肚痛!

Picture

主持們玩完遊戲後, d 主持又無拿拿叫 KK 唱歌喎。KK 便清唱《月亮代表我的心》和《紅日》,他都唱得幾好呀。不過我好想聽佢唱o個首《430 穿梭機 》主題曲呢!

KK 唱完歌後,睇波 show 正式開始。我同埋另外三位同行的朋友都支持車路士嬴波,自然一齊為車路士打氣啦,而在場的車仔 fans 似乎稍比利記 fans 多一點。當車仔的杜奧巴入波既時候,所有在場的車仔 fans 都一齊 Yeah!而在比賽末段,車仔俾利記狂攻,我地大家的心情都十分緊張,有些人仲嗌「頂住、頂住!」,好有一種同甘共苦的感覺。

除左睇波外,當然唔少得主持和觀眾玩遊戲及派禮物的時間啦。有時主持會送錢俾觀眾,有時送月餅。以下係幾張主持們與眾同樂的照片︰

Picture

Picture
觀眾首先轉幸運輪,轉到哪一格便係他有機會得到的獎金,不過觀眾在拿獎金之前,主持會腳踏蹺蹺板,那麼在蹺蹺板的另一邊的月餅便會拋向觀眾,觀眾要用身體或口接到月餅,否則便無法得到獎金,而只能獲得安慰獎月餅一盒。

Picture
我的月餅是最高!觀眾要限時把月餅砌高。不過 KK 同埋阿占好衰既,觀眾辛辛苦苦砌好月餅,佢地又走去整冧佢!

Picture
抽獎時間到!估中邊隊勝出者才有份被抽出。

Picture
鬥長氣比賽。邊位參賽者把今季球彩台的口號︰「球彩台,同你最 friend,Yeah~!」拉到最長,便是勝利者。圖中穿星星 t-shirt 的男孩便是該遊戲的勝利者。

玩完鬥長氣比賽後,是晚睇波大聯盟便以一眾歡笑聲中結束。希望球彩台將來會舉辦多些類似的睇波活動啦!

 

Bel Bel 發表在 痞客邦 留言(0) 人氣()

今日的荷甲早場︰烏德勒支對阿積士,趁我得閒,又係時候出下對呢場既心水先。

呢場波,如果你叫我捧阿積士客勝,我打死都唔制架喇!Why? 首先從往績分析,烏德勒支主場近六次迎戰阿積士,烏德勒支取得五勝一負,往績完全食住阿積士。而且烏德勒支近五次主場都能保時不敗,近兩次荷甲對住海倫芬及華域克,他們都可以擊敗對手,主場作戰可謂相當硬淨和有說服力。

而阿積士雖然三連勝而且狀態不俗,不過他們所遇的對手的實力都係比較弱。加上阿積士上星期四剛在歐協的賽事中,主場大勝挪超的榜末球隊史達。阿積士在歐協上回合同樣大勝史達後,翌場作客卻負於洛達,看來阿積士在雙線作戰的情況下,球員的體力消耗較大,而影響在聯賽的表現。

尋晚有些踢完歐聯後的球隊,他們的賽績都頗出人意表,例如拜仁作客負禾夫斯堡,利物浦作客負保頓,車路士賽和阿士東維拉等。所以小妹估計阿積士會出現「歐協效應」,烏德勒支今日在主場可保不敗。

Bel Bel 發表在 痞客邦 留言(0) 人氣()

最近愛上睇別人的 blog,尤其係 DJ,藝人,節目主持等的 blog。好似我呢 d 平凡 OL,好想八卦下在辦公室以外工作的生活係點。呢幾日在 Yahoo! 度搵到呢位既認真,又攪鬼的有線足球評述員 - 劉舜文的足球與生活

認真︰係因為感受到他對足球及對足球評述工作的投入和熱誠。

攪鬼︰係因為他寫的歌詞,幾有創意。

係佢的 blog 度,除左分享對德國足球的睇法之外,仲透露一點做足球評述員的苦與樂。

原來他日間也是跟大部分的人一樣,都是在寫字樓工作。他夜間還要兼顧評述的工作,確是犧牲了不少私人時間呢,不過他呢份兼職,卻又帶給他滿足感呢!講真,香港地又有幾多人,可以把自己的興趣變為工作呢?在工作方面,劉舜文都算是幸運的一個。

Bel Bel 發表在 痞客邦 留言(0) 人氣()

今日有五件事令我好開心:

第一係同 Allan, Cruise 呢兩位好耐無見的朋友一齊去荷里活廣場度睇車路士對利物浦。

第二係阿仙奴作客開齋嬴波,仲要係嬴曼聯。

第三係我今日終於買到合身的阿仙奴主場球衣。仲要係一著呢件波衫,阿仙奴就嬴波,很有紀念價值呢!

第四係我終於 o係呢個 blog tip 中 PSV 燕豪芬嬴波。

第五就梗係阿鵬走埋黎我度,主動送錢俾我啦!

我在六點零鐘度在某店舖前等朋友時,見到阿鵬坐在睇波的會場內,咪同佢揮揮手 say hi 囉,阿鵬都好 nice,也向我揮手呢。

佢落場派完錢俾第一位男士後,就想派俾一位女仕。唔知係今日我化左個靚妝,還是因為阿鵬認得我,加上我又望住佢,所以佢就話乜野「重色輕友」,並且走到我前面,問我︰

「邊個係最型的主持呀?」

我就答︰「阿鵬~」

「講多一次~~」

「梗係阿鵬啦~~」

於是阿鵬就送我四百大元!佢仲話女仔派多 d 喎!emoticon

關於是次的睇波 party,我呢幾日就會 update,仲影左幾張幾位主持的相片。有興趣的網友要記得返黎呢度呀。

Bel Bel 發表在 痞客邦 留言(0) 人氣()