Bel Bel's Lifebook ♥ 自言自語

上星期六剛上演一連串歐洲國家盃外圍賽賽事。不過由我中學時只會睇靚仔球星，直到近年才開始學睇波，到現時為止，我還未找到一隊令我傾心的隊伍，所以睇波的投入感比較小。可能我咁講，會令 d 識波之人覺得我好不知所謂架喇。

查實我在 94 年時都曾經係意大利國家隊的所謂 fans o黎o既，不過自從巴治奧不再入選國家隊之後，加上那時我家沒有安裝 Cable TV，唔好話意大利國家隊呀，就連乜超乜甲乜聯賽等都無機會睇，咁我又點知意大利踢成點啫？

好多人都話鍾意英格蘭，可能因為香港曾經是英國的殖民地，所以都對英格蘭有種講不出的情意結啦。不過我偏偏對英格蘭呢隊波無乜好感喎，我想係因為英格蘭班球星俾我的感覺，都係太浮誇吧 (夏格維斯例外)，我也經常在足球新聞裡，閱到他們的花邊新聞，就連他們的女友太太都喜歡爭相見報博宣傳，就像娛樂圈一樣，彼此爭艷鬥麗。加上他們在許多賽事中的表現也是一般，跟一眾球星們的名氣不成正比。

至於我的前愛隊意大利呢？唔知點解我好唔 like 托迪呀，雖然佢都幾好波。我諗都要等佢退休後，先考慮會否重投意大利的懷抱了。

至於法國隊呀......本來隊中有亨利、韋托特等阿仙奴的球員，以前仲有球王施丹等。不過就係好難解釋點解唔太鍾意法國隊囉。

西班牙 - 其實唔係好識......

唉，越寫越覺得自己好不知所謂。

查實我最近都留意下荷蘭同埋德國隊，因為都想搵番一隊我認為捧得過的隊伍。

而在週六的直播賽事中，我就偏偏收睇個場無波入的比賽。雖然荷蘭上場嬴唔到，而且中前線無乜默契，又成日交失波，也無乜邊次射門似樣，不過我估佢地仲有機會出線掛。我都幾睇好亨特拉爾同埋雲達華治的未來既。雲達華治好波就係人都知，如果漢堡無左佢，明年都好大機會在德乙見。記得去年 7, 8 月左右，阿仙奴同埋阿積士踢左場柏金紀念賽，阿積士追番那球，就係亨特拉爾射入架，同埋都覺得佢幾識得把握到埋門的機會。

有時都間唔中見到有球迷話，好懷念荷蘭三劍俠的時代，可惜我就無乜機會見識見識了。

至於德國國家隊嘛，以前聽舊朋友講，德國波好悶既，不過佢就係鍾意德國的防守做得好喎。但係在剛過去的世界盃，德國隊經奇連士文的帶領下，大打進攻足球。我覺得德國隊入唔到決賽真係好可惜呀，如果入到既話，我諗決賽一定唔會有十二碼睇。其實進攻足球都啱我荷車既......