今日好眼訓呀！不過小妹都想趁 lunch time，講下昨晚巴塞對雲達個場波先。
講真呢兩隊波我都幾鍾意架，不過佢地只能活其一，我覺得真係可惜呀！
巴塞無論在進攻或防守方面都比雲達優勝，而巴塞的勝出是在許多球迷的意料之事。
我睇車仔的比賽時，都無見過古莊臣咁扭得既，尋晚見到佢在禁區內扭過幾個雲達後防，真係嘆為觀止！仲有朗拿甸奴個腳地波罰球都射得唔錯，雲達班人牆點解會跳起既？如果唔跳起或者個球唔會入都唔定......同意黃興桂的意見，雲達在輸左第一球波就自亂陣腳，有種任人魚肉的感覺 ~_~。至於第二球由細哨策劃，交俾古利，然後古利傳中古莊臣射入，充份表現出巴塞的團隊精神及默契。雖然事隔一星期，不過既然之前我話過我想講番關於傑志 vs 和富大埔的感受，咁我就一定會寫的。
自從和富大埔升上甲組後，便引入了許多外援，呢場波他們的兩個入球，都是由隊中兩位外援包辦的。無疑增兵會有助加強其實力，不過我又覺得他的的鬥志也很可嘉，好像在下半場他們被傑志球員佔盡優勢，但是他們仍然好努力地做好防守。
那日我偶然地坐在和富大埔街坊們的打氣區，雖然人數不多，但也感受到他們對愛隊的愛護和支持。我也有幸地見到和富大埔的班主在比賽後，親自走到觀眾席和大埔的街坊致謝。他說︰「很多謝大家的支持，不過球隊還未脫險，我們會繼續努力的。」那時我感到，和富大埔的球員，領隊，和大埔的街坊球迷之間，有一種與別不同的親密感，總是覺得那種親密感跟南華球隊和 fans 之間是有分別，但是又唔知點形容那種分別。
另外，和富大埔嬴波後，看見連 ESPN 也為其領隊做訪問，幾威！
和富大埔 (紅色球衣) 在下半場補時階段的罰球，一射入網！
和富大埔嬴波了，球員和教練都興奮莫名！
和富大埔的球員跑到觀眾席，向各支持者致謝。
傑志對和富大埔呢場波好好睇呀，而呢場波的高潮在下半場臨完場前，大埔在臨完場前一分鐘在蛾眉月頂射入罰球反勝呀，Yeah~!
和富大埔要繼續努力啦！
本來想講多 d 關於呢場波o既o野，不過一返到屋企，我的傷風又復發了 (好辛苦
)，加上要睇曼聯對車仔呢場大戰，所以過多幾日先再講啦。請諒。
漢堡又輸多一場了！今次是 1:2 反輸給拜仁慕尼黑。點解漢堡上屆登上德甲聯賽第三位，今季卻折墜到降到聯賽榜尾二的位置呢？除了今季漢堡的傷兵一大籮而影響成績外，或者各位可以從這場比賽中找到答案。
在上半場初段，漢堡搏得一個十二碼，領先 1 比 0︰迪米捷利斯禁區內踢跌辛洛高，雲達華治操刀射死角入網。拜仁在落後雖然積極反撲，但卻做不到有威脅的攻勢。到了下半場拜仁換入迪斯拿後，漸漸地取得中場的優勢，而他們後來追和甚至反勝的兩球，都是憑這位剛復出的迪斯拿舖橋搭路。
拜仁追和的一球，是因為漢堡的後衛們裝越位失敗，他們好像觀眾那樣，只是站著看馬卡爾接應迪斯拿的傳中，然後射入自己的龍門。拜仁追和後，更加得勢不饒人，而原本鬆散的漢堡後防雖然努力在後半場守住，可是仍然無法抵擋拜仁的狂攻。最終比沙路在禁區內接應迪斯拿的傳中波，一射破網，協助拜仁反勝。
漢堡在臨完場前本來有扳平的機會，年輕的前鋒費寧加 (Fillinger) 在禁區內遠射，僅僅掠門而過，可惜。
事實上拜仁自換入迪斯拿後，他們中場的組織更為緊密，不過漢堡看來陣中缺少了攔截力強的防守中場，而無法截停拜仁的攻勢。另外，漢堡的入球能力和防守意識仍然有待改善。
歐聯分組賽 G 組的出線形勢仍未明朗，在第五輪賽事之前，阿仙奴，波圖和莫斯科中央陸軍都有出線的機會。
阿仙奴明日如能在主場擊敗漢堡，下一場作客守和波圖，加上莫斯科中央陸軍明日在主場贏到波圖，那麼阿仙奴出線的機會相當大。但是，世事是否會那麼完美呢？
阿仙奴今季的主場仍然保持不敗，不過他們面對弱旅，經常都和波而回。阿仙奴舊有的小組滲入的進攻模式，只要面對弱旅們 9-0-1 的密集防守，便減低入球的機會。另外，一群小將們不擅打逆境波都是不能致勝的原因。加上隊中近期有路斯基、雲佩斯和加拿斯受傷，進攻的板斧又少了一瓣 (主場對利記那場，三比零那球是由加拿斯射入的)，也為他們的後防線帶來一點隱憂。幸好亨利終於回來了，在上仗對紐卡素的表現很出色，期望他對漢堡的表現都咁好。還有剛傷癒的龍格堡、上場沒有上陣的基拔圖施華，今仗也許會復出。基拔圖施華的復出應該可減少後防的壓力，而龍格堡可當後上支援前線的角色。
至於漢堡，相信季前無人會料到他們的成績如此不濟吧。今季聯賽他們只是作客嬴了利華古遜，其餘不論是歐聯或本土聯賽，不是和便是輸，狀態十分低沉。其實他們自開季不久，隊中便不斷有人受傷，所以唯有抽調一些經驗不足的後備和丙組北區的隊員上陣。隊中近期的傷兵有中場蘇連 (Sorin) 、左閘甘賓尼 (Kompany)外，另外兩名後防萊因哈特 (Reinhardt) 和迪美 (Demei) 也繼續養傷，影響其後防線的穩定性，在近 13 場聯賽的賽事中，共失 15 球，平均每場都要失一球。不過可幸的是在上星期四，兩位後防馬達維基亞 (Mahdavikia) 和艾杜巴 (Atouba) 開始跟大隊操練，預計作客對阿仙奴上陣不成問題，有助防線的穩定性。前線方面，巴巴斯的離隊令漢堡失去進攻的重心，雲達華治自傷癒復出後，狀態還有待提升。看來漢堡的攻力在短期內也不會有所提升。
既然漢堡在歐聯四戰全負，連爭第三名拿歐協入場劵也沒機會，相信他們已經放棄今場賽事，寧願專心打護級好過。以漢堡現時疲弱的攻力，看來不會對阿仙奴的門前製造太大的威脅。所以今場波，預計阿仙奴取勝不難。
昨晚雖然下著滂沱大雨，而且有點冷，不過小妹仍然到了旺角大球場看亞洲盃外圍賽：香港對孟加拉的賽事。因為港隊領隊黎新祥、蔣世豪和李偉文，賽後便會離隊了。
結果香港憑著卓卓上半場接應羅志焜的傳中，頭鎚頂入破網，與及下半場卓卓親自操刀的十二碼，以 2:0 擊敗孟加拉，以勝利送別黎新祥，和兩位隊員蔣世豪和李偉文。
卓卓射十二碼
電訊盈科今日正式宣佈奪得英超聯本港獨家播映權了。
(摘自星島日報即時新聞 11月 15日 星期三 03:30AM - 挫敗有線 電盈15.6億播英超)
消息人士料，電盈付出的轉播費用將達兩億美元（約十五億六千萬元），未來每月的英超轉播費用便高達四千三百萬元，以NOW有二十萬用戶訂購，每戶成本最少要二百元。
雖然小妹是 now! 的訂戶，表面上對於我來講沒有影響，不過如果來季我想透過 now! 睇英超，我會否需要付費？因為我的 subscription plan 只包括 ESPN，Starsports 和 ESPN Plus，及一些我們一家從來不會收看的新聞台等。既然電盈以天價投得英超直播權，以「羊毛出自羊身上」的道理，舊的訂戶想睇英超是否要額外付費？另外，新客戶的月費會是多少？很多球迷也很擔心呢。
其實對於有線來年再沒有英超賽事直播，我覺得幾可惜。雖然我還是喜歡聽黃興桂和江忠德的旁述，但有線一直以來在足球賽事的宣傳做得很好，許多足球大賽的宣傳短片都很有創意，令人印象深刻。偶爾還聽到劉舜文和其他評述員為英超唱的口水歌，很有趣。 當然還有球彩台那班如 friend 一樣的主持，在電視見到他們一面講英超，一面講無聊o野，都幾開心o架！
當有線沒有英超的時候，現有的評述員和足球節目主持人，哪些會被 out 或過檔到其他電視台呢？
昨日在上一篇文章係咁易推利物浦不敗......
唔知點解覺得.....我又會再燈一次
阿仙奴岩岩在外地由讓平半轉讓半球喇! 不過馬會就一路 keep 住讓半球超高水。咁即管睇下邊個莊開得準。
既然已推利記不敗，咁順便推埋和波啦，因為阿記主場未輸過。
(added on 1:43 a.m.)
小妹又再次不惜背負地獄燈后之名
，成功詛咒利記，仲幫埋自己愛隊嬴波！
阿仙奴嬴左 3:0，well done 
小妹期待的港甲榜首大戰，終於在今日下午四時開波喇。雖然小妹並不是任何一隊港甲隊伍的 fans，不過呢場波我都希望南華會有好表現既，因為在這場比賽前，聯賽首名的傑志拋離南華七分之多，如果南華能在今場迫和甚至嬴埋，就可以把彼此的分數拉近，在下半季的聯賽戰情將會更緊湊。
南華在賽前很認真地檢討上仗對流浪大敗的原因，和針對傑志的踢法作出部署。他們在今仗放棄常規的 4-4-2 陣式，而改以 4-5-1 陣式出擊，結果南華在下半場憑 T史高斯和郭建邦的入球，打破了傑志連績七戰七勝的紀錄。南華的 fans 見到愛隊今仗的表現咁好就更加開心啦，坐在第 14 區的 fans 都穿上南華的打氣 T-shirt，一起吶喊打氣啦！雖然今日是賽馬日，不過今場波的入場觀眾有 3,560 人，仲多過兩星期前愉園對南華的賽事。當南華入波個陣，所有南華的球迷一起狂呼「好野！」，「Yeah!」，這種熱血沸騰感覺，叫我興奮得難以用筆墨來形容！
小妹見傑志近七戰全勝，賽前仲以為呢場波的比賽場面會係一面倒添，點知係岩岩相反，南華比我想像中表現得好，相反傑志可能被南華搶了中場，拍甩他們很多球，他們的威力似乎無法發揮。上半場雖然悶左少少，不過下半場隨著南華換入 T 史高斯和黃鎮宇，還有傑志的高文被趕出場，南華的氣勢又返晒黎喇！T 史高斯入左黎無耐就射破傑志的龍門， 1 比 0 了！到了 80 多分鐘，郭建邦在門前頂入 2 比 0。真是高興！恭喜晒南華嬴波！
張春暉的表現都係咁好，救了許多險球，今日仲獲得十月份最佳球員的獎狀添，加油呀。
迪天奴今日發揮唔到他的制空威力，他既俾人 mark 死左，而且兩側無乜支援和輸送俾到佢。
「香港亨利」鄭少偉幾勤力，不過身型太單薄，技術上仍需磨練。
今日見到藝人阮兆祥和林曉峰入場睇波，唔知佢地坐係邊呢？
另外在中場休息時間，舉行了「最具創意球迷服裝獎」選舉。其實有位南華 fans 戴左一頭紅色假髮，仲有一位傑志 fans 扮到成個藍精靈咁，都幾突出丫，不過點解拿冠軍的卻係著露臍裝的女球迷架 (雖然她都幾靚女)？
黎緊的星期，將會上演港甲上半季最後一輪賽事，有興趣睇港甲的球迷記得捧場啦！
P.S. 黎緊星期四晚在旺角場會有南華對聯華紅牛的賽事，我想去睇呀，不過應該去唔到喇 ...... >.<
其實阿仙奴在上半場的形勢都算係壓倒性，他們係咁攻，陸軍只可以係咁守住。最無奈係在臨完上半場前，亨利把個波橫傳俾路斯基，他面對空門，點知都係踢番俾個龍門.......
不過呢隊陸軍的部署及防守真係值得一讚既，他們在中場體力化既截擊，令阿仙奴唔可以好流暢地做到攻勢，下半場體力不繼，攻勢開始冇咁入肉。
阿仙奴今日真係撞邪......
(係咪因為我買左條 4x1: 阿仙奴 W x 里昂 W x 皇馬 W x AC W, 所以阿仙奴嬴唔到呢? 真係撞邪...... 
)
趁小妹有少少時間，講下歐聯 A 組的形勢先。
A 組的球隊同踢了四場波，截至今日為止，車路士以 10 分排榜首，雲達不萊梅以 7 分排第二，而巴塞隆拿由於未能在主場嬴車路士，所以四戰只得 5 分排第三位，包尾的索菲亞利夫斯基四戰全負得 0 分。
在今個月的 22 日，雲達將會在主場迎戰車仔，而巴塞將會作客利夫斯基。另外在下個月的 5 日，巴塞和車仔分別會在主場跟雲達和利夫斯基對碰。
小妹預計車仔會以六戰不敗的佳績首名出線，以車仔的防守能力，相信去到雲達主場至少都取得 1 分 (希望車仔唔會俾我「燈」到啦！)，返到主場也食硬利夫斯基喇掛！
現在巴塞只得 5 分，很多球迷或會擔心他們會出局。如果雲達下場嬴了車仔，睇黎巴塞可以疊埋心水踢歐協，不過小妹認為雲達嬴車仔的機會不大，除非車仔有心「整走」巴塞。相信巴塞會大炒利夫斯基，不過巴塞在最後一場分組賽對雲達，巴塞真的非勝不可了。
在我講南華對流浪呢場波之前，俾我講小小關於早場的賽事先，就係公民對愉園。
愉園的後防可以用「豆腐」兩個字黎形容，如果唔係公民球員面對空門都唔識入波既話，愉園分分鐘倒輸都唔奇。呢場波愉園上半場領先一球，最終以一比零完場。
不過南華今日的對手流浪就唔同 lu，流浪的後防線穩固得多了，以南華的進攻模式，想入波真係唔係咁易......
結果南華輸了零比三俾流浪。
好多球迷散場時都話，可能羅生在今場波無俾獎金，或者班球員拿上場的嬴波獎金o黎去 wet，所以今場南華球員唔多願郁，所以輸波，呢句話小妹不敢苟同了。不過南華的 fans 都對其愛隊的表現相當失望，因為他們喜歡南華，是因為他們那「打不死」的拼勁，比賽落後時會拼命進攻，努力爭取入球。小妹見到南華當落後到二比零時，他們才如夢初醒，不過看來太遲了。
上半場基本上流浪控制戰局，南華的射門次數寥寥可數。另外南華都幾倚賴角球和頭鎚攻門 (印象中仲有幾隊本地球隊都係咁)，進攻瓣數不多，好像打下小組滲入、穩守突擊等都沒有做到。還有迪天奴經常被對方後防盯死，後防轉身和回防又慢，不過南華龍門張春輝的表現都算唔錯，否則可能唔只輸三球。
仲有今日才發現馮嘉奇都幾好波，控球能力不俗，見到他多番在左路引球推入禁區助攻，都幫到球隊製造攻勢。高梵跑得好快，南華後防根本 mark 唔住。所以流浪嬴波呢個賽果都好合理。
另一方面，真係要讚下南華工作人員的用心和努力。今場他們在場內除了派發加入球迷會的表格外，還派了紅色氣球棒給球迷製造「紅海」。可是似乎只有坐在近雀仔街那邊的南華 fans 才舉起紅色氣球棒，坐在另一邊的部分內歛的南華 fans 都把氣球收起。話雖如此，在場的南華的 fans 還是比其他球隊多，也許會聽到他們在愛隊輸波後喝倒彩，或者輸打嬴要，不過小妹卻覺得他們只是「愛之切，責之切」，球迷有意見表達總比沉默的好。
今日去o左旺角大球場，睇o左兩場幾精彩的本地甲組賽事︰早場的流浪對聯華紅牛，及尾場的南華對愉園。流浪以 2:1 擊敗聯華紅牛，而南華以 3:1 大勝愉園。
正如 Johnny 在留言講過，在旺角場睇波比起在香港大球場睇，是兩種截然不同的感覺。我覺得在旺角場睇波，比在香港大球場有多一份親切感，可能係因為球場細啦，跟觀眾席的距離很近，再加上旺角場是沒有獨立座位的，觀眾與觀眾間坐得也很近。還有的是入場的人數也比我估計的多許多啦，球場兩旁的座位可算是座無虛席。我在中場休息時離開座位一會，當回到自己的座位時，卻發覺我原本的座位被別人佔了。
另外門票只售 $60，便可一併看兩場賽事， 好抵睇。
還有愉園和流浪的球迷會，都在場內分別銷售紀念特刊和球會波衫。愉園也同時招收新會員。
我覺得流浪的實力稍比聯華佳，不過流浪的門前把握能力似乎需要改善，球員面對空門也不能把球送入網，坐在我附近的阿伯 fans 們不斷講粗口問候球員，還大聲疾呼，教他們該怎樣攻門呢！
聽講有線足球評述員馮嘉奇都是流浪的球員，不過點解我見唔到「馮奇」出場既？講真丫，呢場波我唔係咁集中精神地睇，因為我蠢囉，無帶雨傘或太陽帽，而今午陽光很普照，幾乎把我溶掉...... 
幸好到了尾場的南華對愉園，陽光比較沒有那麼猛烈，還吹了微微涼風，在呢種天氣下睇波都幾舒服。
原來入場的觀眾大多都是南華的球迷，看見南華入球時，觀眾的熱烈反應便會明白。
點解許多人都說南華對愉園是一場大戰呢？在 forum 有網友話因為南華好多年都沒有嬴過愉園喎......
今日南華真係非常「好波」！開波後三分鐘，南華的史高斯的頭鎚頂入愉園的龍門，領先 1 比 0。可能因為愉園的後衛們身材較矮小，睇黎無法抵抗南華的高空攻勢，十多分鐘後南華的「大猩猩」迪天奴頂入角球，2 比 0 啦~！不久，又係史高斯的勁射，為球隊射成 3 比 0。
真係估唔到咁早就奠定勝局！南華可謂盡顯霸氣，而愉園真係「無得打」，上半場基本上南華控制著戰局，不過之後他們再沒有繼續數糊，我就覺得無之前個十幾分鐘咁好睇喇。也許部分球迷都覺得這場波大局已定，所以他們在中場時間便離場了。
下半場愉園換入「豪豬」蔣世豪及兩位球員，之後漸漸地做番主動，可惜都無功而還。不過到了八十分鐘左右，愉園終於破蛋了，可是仍未能平反敗局。
現場的氣氛真係非常好，南華的入球，令到在場每個 fans 都一起歡呼，簡直係熱血沸騰！不過如果大家可以好似外地聯賽的主場咁，可以唱下會歌就更加「正」喇~！如果有些資深的南華的 fans 睇到我呢篇文章，會否考慮下帶頭唱下會歌？(咪住...... 乜原來愉園今日名義上係主場黎o架？失敬失敬。唔怪得唔見南華的 fans 打鑼打鼓......反而看見對面的愉園 fans 既攤開會旗又打著鼓打氣啦。)
我真係有少少唔明點解，點解入場的南華 fans 比愉園，甚至比其他本地球隊多呢？雖然 80 年代或以後出生的年青人，也許不太認識本地足球，但係 70 年代或以前出生的球迷，我估他們都各自支持不同的球隊吧，那麼除了南華外其他球隊的 fans 呢？難道他們也不再入場睇波？
o係呢場波，真係不得不讚近態大勇的杜奧巴！前o個一兩年，我成日叫佢做「豬油包」，因為他在聯賽經常錯失入球的機會，所以經常令車仔開出 1:0 的「黃金比數」。剛在上個月車仔對利記，都係杜奧巴一個半車身抽射破網，那場波開始我才決定唔再叫佢做「豬油包」！今場對巴塞，杜奧巴接應艾殊利高爾傳中，擺脫了佩奧爾的防守，勁射入網。以杜奧巴的強勁的突破能力及不俗的頭槌入球能力，唔怪得佢經常都踢正選啦。
仲有第三門將希拉里奧的表現很穩定，無乜點犯錯，予人驚喜。車仔的球迷大可放心了。
馬基里尼和艾辛搶嬴晒中場。後防線很穩陣，而且成功鉗制細哨、美斯和古利的攻勢。
至於舒夫真高，我看見他在下半場的半單刀後，覺得以往的他漸漸回來了。只要他下定「開齋」的決心，相信好快便會睇到他的世界波。
今晚的亞洲盃外圍賽，香港作客令人失望地吞了卡塔爾兩隻光蛋，再加上烏茲別克於同日作客 4:0 擊敗孟加拉，看來香港隊無機會出線了。
另外今晚的歐洲國家盃外圍賽的賽果都幾正路，大多傳統強隊都嬴到波。不過英格蘭輸左俾克羅地亞，在 forum 見到好多英格蘭躉都好失望呀。我都睇左呢場波一陣，覺得克羅地亞佔盡優勢喎。同埋英格蘭入的 own goal 真係好肉酸，加利仔把球回傳俾羅賓遜，羅賓遜本來想把球踢走，怎知踢了空氣，皮球就係咁 "look" 左入網。@_@
另一場直播賽事，波蘭對葡萄牙的賽果都幾爆冷下，比數是波蘭 2:1 嬴葡萄牙。施莫拉域為波蘭射入的兩球真係好靚。呢場波葡萄牙後防都俾左好多機會對方破門，米基爾包左 offside，裝越位失敗下又俾施莫拉域入第二球。其實波蘭入左兩球波之後，他們的防守都幾嚴密，葡萄牙都無乜機會埋門，就算 C 朗拿度在邊線斬波到底線，在遠柱位置的前鋒都 follow 唔到。不過在下半場補時階段，葡萄牙的紐奴高美斯接應森馬奧的傳球，終於追成 2:1。
(仲有既係好高興聽到丁偉傑評述波蘭對葡萄牙的賽事)
昨日，是我有生以來第一次入場觀看香港甲組聯賽的賽事，就是南華對香雪晨曦。
其實在約一個月前，我偶爾收看《星期二檔案》，講述和富大埔呢支由許多業餘球員組成的升班球隊。看完這集專輯後，不知為何突然想去看香港甲組的比賽，於是趁昨日有空，便獨個兒去香港大球場睇南華對香雪晨曦。
我約三點四十分左右進場，當時和富大埔對公民的比賽還未完結。和富大埔在比賽末段面對公民隊的狂攻都頂得住，最終以 0 比 0 完場。恭喜大埔拿得升班以來的第一分。
昨日進場睇波的球迷比想像中多呢！原來昨日入場的球迷共有三千四百六十一人，是今季開季以來的新高。球迷多集中坐在西看台下層的座位，其中以支持南華的觀眾佔大多數。有些球迷看見南華的防守做得差，經常把皮球橫傳，而且多次「走甩」晨曦的前鋒，便破口大罵；當南華在下半場追回一球時，許多球迷都站起來拍掌歡呼。誰說香港的球迷不熱情？
不過我覺得上半場南華的進攻不夠入肉呢，而且間唔中裝下越位，反而晨曦卻「襟住黎砌」，上半場晨曦先入一球，以一比零領先上半場。下半場早段，晨曦射罰球中柱，然後有球員執雞入網，擴大比數至二比零。
雖然晨曦領先二比零，但那時我總覺得南華會追成較近的比數，甚至迫和。果然晨曦在入左兩球後攻勢減少了，相反南華並沒有放棄，加上在眾多南華 fans 的吶喊打氣下，真的追成二比二平手。
講真兩隊都沒有像巴塞、阿仙奴等美妙的地面推進及小組入滲戰術，而是踢法比較高 Q 大棍，不過他們的對碰，卻一同譜出一場精彩緊湊的比賽，看得觀眾如痴如醉。加上南華那打不死而永不放棄的精神，難怪至今仍然有部分追隨多年的球迷繼續支持。
願入場看香港甲組比賽的球迷人數能再創另一新高！
今日的荷甲早場︰烏德勒支對阿積士，趁我得閒，又係時候出下對呢場既心水先。
呢場波，如果你叫我捧阿積士客勝，我打死都唔制架喇！Why? 首先從往績分析，烏德勒支主場近六次迎戰阿積士，烏德勒支取得五勝一負，往績完全食住阿積士。而且烏德勒支近五次主場都能保時不敗，近兩次荷甲對住海倫芬及華域克，他們都可以擊敗對手，主場作戰可謂相當硬淨和有說服力。
而阿積士雖然三連勝而且狀態不俗，不過他們所遇的對手的實力都係比較弱。加上阿積士上星期四剛在歐協的賽事中，主場大勝挪超的榜末球隊史達。阿積士在歐協上回合同樣大勝史達後，翌場作客卻負於洛達，看來阿積士在雙線作戰的情況下，球員的體力消耗較大，而影響在聯賽的表現。
尋晚有些踢完歐聯後的球隊，他們的賽績都頗出人意表，例如拜仁作客負禾夫斯堡，利物浦作客負保頓，車路士賽和阿士東維拉等。所以小妹估計阿積士會出現「歐協效應」，烏德勒支今日在主場可保不敗。
最近愛上睇別人的 blog，尤其係 DJ，藝人，節目主持等的 blog。好似我呢 d 平凡 OL，好想八卦下在辦公室以外工作的生活係點。呢幾日在 Yahoo! 度搵到呢位既認真，又攪鬼的有線足球評述員 - 劉舜文的足球與生活 。
認真︰係因為感受到他對足球及對足球評述工作的投入和熱誠。
攪鬼︰係因為他寫的歌詞，幾有創意。
係佢的 blog 度，除左分享對德國足球的睇法之外，仲透露一點做足球評述員的苦與樂。
原來他日間也是跟大部分的人一樣，都是在寫字樓工作。他夜間還要兼顧評述的工作，確是犧牲了不少私人時間呢，不過他呢份兼職，卻又帶給他滿足感呢！講真，香港地又有幾多人，可以把自己的興趣變為工作呢？在工作方面，劉舜文都算是幸運的一個。
尋日真係捉到鹿唔識脫角，睇到樸茨茅夫四場無失波，本應 tip 佢地尋日唔失波，平手盤坐左望嬴兼入球細先岩，點知又做左燈后添 。
今日就 tip 下呢場荷甲早場，PSV 燕豪芬 vs 飛燕諾。佢地分別在上週三及週四參戰歐聯及歐協，而咁岩佢地都係和波。
自開季以黎，燕豪芬四戰兩勝一和一負，據有些睇過佢地首戰作客對川迪的賽事，佢地都認為燕豪芬缺少左去季的霸氣，不過之後的三場賽事似乎有改善，上星期三在主場迎戰利物浦都能抵擋利記多番的攻門。今仗對飛燕諾，雖然高古因傷缺陣，不過今季剛回巢的前鋒古華特，今場應會上陣。
飛燕諾呢班波？上季相信佢地為好多賭仔輸左唔少錢了。近年的飛燕諾的成績始於不及燕豪芬及阿爾克馬爾，而且俾人的感覺係退步左，上季作客 17 場，8 勝 4 和 5 負，只係嬴過阿績士，其餘嬴的只係中至下游的隊伍，作客一般。今季首戰對格羅寧根仲要輸 3:0 添！
再者，飛燕諾今季無左主力射手古積特和沙洛文卡勞，實力大減。加上燕豪芬主場成績彪炳，上季至今仍然 keep 住不敗。所以小妹 tip 燕豪芬主場全取三分。
以近期兩隊波的狀況黎講，查爾頓自開 League 以黎，雖然睇起黎在四場賽事只係嬴過保頓，其餘的賽事都輸晒，其中兩場佢地係輸俾英超班霸車路士和曼聯，另外一場作客敗給韋斯咸，不過係呢場波查爾頓打少一個，他們在領先一球後再被主隊反勝。他們的近況好差？都唔係既，不過佢地都係好似上年咁，又入得，又失得。
至於樸茨茅夫，自從上季有俄羅斯財團注資後，佢地係球季後段的表現確有改善，而且在季尾更連嬴多場而成功護級。今季季初購入門將占士，中堅蘇金保及左閘格連莊臣，這條新組成的後防線令他們在開 League 後的賽事中未失一球，四場三勝一和的佳績令佢地高踞聯賽榜第二位。
不過在盤口方面卻有點古怪。近態咁好的樸茨茅夫居然只開平手盤，唔駛讓波又真係幾著數，也許是因為在往績上，查爾頓在主場未輸過俾樸茨茅夫有關吧。在小妹打篇文的時候，查爾頓由平手低水回到中水，不過始終呢個盤都係有點古怪，故小妹今日並非推介邊隊會嬴，而係推介入球大。因為查爾頓的後防線真係好唔掂，而且馬會的入球大有 2.02 ，都幾好分頭架。
祝各位今晚嬴多 d。:)
健康纖體 (6) 保健衛生 (3) 購物手札 (2) 博主通告 (2) 博客活動 (4) 送禮時間 (2) 時尚衣飾 (3) Bel Bel 日記 (3) 個人感受 (6) 美容彩妝 (15) 悠遊世界 (13) 民以食為天 (3)
