Bel Bel's Lifebook ♥ 自言自語

點解要寫 blog?
其實好想同人分享下我的閒事心事, 因為平時返工, 和同事都唔係有好多共同的話題。有一日, 就無意中留意到有 blog 呢樣野, 同埋見到人地 d blog 都有好多人留言。所以想試下寫 blog, 希望搵到 d 肯聽我講野既人啦。在網上識到既人, 都好少會同自己有 d 乜野利益衝突, 比較能暢所欲言。
而寫關於足球的文章, 就係純粹想學下點樣睇一場波, 試下發掘下某隊波邊度做得好, 留意下佢地邊 d 地方要改善 etc.。以前睇波都係純粹為左睇靚仔, 同埋剩係睇住廿二個男人在草地上跑黎跑去, 都唔知人地用緊乜野陣式乜野戰術, 對住部電視個幾兩個鐘, 如果好似都幾 on 居。
不過我又好鍾意睇到 d 球員入波 celebrate 的動作, 印象最深刻就係 94 年世界盃, 白必圖入波後, 雙手做出搖籃的動作, 就係用入球送給他那剛出生的孩子。
同埋都覺得足球最引人入勝的地方, 就係有時有 d 比賽, 未到最後一分鐘都唔可以咬定邊隊嬴梗, 好多野大家都未必預計得到。好似在剛過去的華倫西亞對車路士的賽事, 車路士靠著後勁在 90+ 拿到好重要的作客入球, 反勝華倫而出線, 連加時都慳番！
點解鍾意阿仙奴? 我係透過某位我喜歡的異性朋友口中, 認識阿仙奴呢隊波既, 他都係阿仙奴 fans 之一。個陣應該係 2001 年初左右......記得 2000/2001 那年球季, 阿仙奴成績都係麻麻, 至少無曼聯咁好......
雖然阿仙奴那年連 FA Cup 都輸埋俾利物浦, 成績未算係最好, 不過都開始留意下阿仙奴的賽事, 因為想和我暗戀的對象有更多的話題。後來還去阿仙奴的 forum, 還 join 埋網友們的睇波活動, 識到一些朋友。
我都有幸地見證到阿仙奴成績最好個段時間, 2002 那年他們拿了雙料冠軍 (英超和 FA Cup)

唔覺唔覺呢個復活節假期已經過左五份之四有多喇。我覺得呢個長假期有種白過的感覺，因為基本上呢個假期都係在養病中渡過，仲要係日咳夜咳。唔知呢 d 係咪叫犯賤呢，因為個天係都要我趁在長假期先黎病！

其實今日都幾天晴架，所以我又有 d 想出外取下景，為我現在連載的處女小說拿點靈感。預告下先，女主角 Ceci 就黎要搬喇，所以我都係時候幫她搵屋囉。究竟她搬去太子旺角一帶的舊樓好，還是面向藍天碧海的私人屋苑好呢？不過後者對於我同她黎講都好貴租。

不過話時話我都有成兩個禮拜無做過運動了，所以一陣寫完我要寫的文章後，又要去健身室跳下 Aerobic 了。

還有在上星期六下午，我在我屋企附近的商場無聊行下個陣，偶然地見到孫耀威呀。 他當時在商場同 Donald 小儀做緊電台節目，我仲見番我的舊 best friend 添！估唔到她都支持左 Eric 成十年，真係長情！而且她份人仲係咁好傾添。

講起上黎，我覺得我寫呢個 blog，好似變成我第二份 job 咁，如果有 d 專題在一個星期都寫唔到一篇，我都會「事後檢討」架。我覺得我呢份 job 都做得唔係咁好，不過都有 d 讀者間唔中都上黎睇，多謝你地的支持呀。我會得閒諗 d 好野寫出黎架喇~

原來今日係張國強 KK 最後一日 (?) 在球彩台做嘉賓主持呀......其實我都係聽到少少咋。雖然佢話因為要去大陸拍電視劇，所以要暫別。不過我聽到 KK 話做埋今晚，都好唔開心呀。

話晒 KK 都陪住我們成長嘛，好似我們的大哥哥那樣，給人一種很有親和力的感覺。

我想由於 KK 既有豐富的踢職業比賽和幕前演出經驗，所以他既能分析比賽的局勢，也懂得令節目更吸引。

記得某晚球賽直播，阿鵬和 Wendy 都沒有出現，幸好有 KK 在場擔任評述工作，他也把節目的氣氛弄得很好，使比賽加添緊張的氣氛，令觀眾都很投入在球賽當中。

唔知下季球彩台，仲會見到邊個主持人呢？唔知當中有 d 會唔會「轉工」呢？

成日都睇到 d blog 友話睇過邊套戲，不過就係得我一個從未講過睇過 d 乜野戲。

講真我對電影的興趣不大，除非個套戲的故事大網好吸引，可能由細到大都係唔鍾意 d 唔真實既事啦。

我諗我睇得最多戲個段時間，就係我同 ex 拍拖個陣。我地差唔多個個禮拜都入戲院咁滯，因為佢勁鍾意睇戲，同埋講真睇戲都算係最好的拍拖活動之一，因為一睇就差不多兩個鐘，睇完就行一陣食下飯，咁就唔駛特別去諗要乜野節目喇。

話時話我又好怕一條友入戲院睇戲，因為通常都係一 pair pair 情侶去睇戲既，好似影得我好孤伶伶咁，而且唔想出街就遇番我 d 舊同學/朋友/同事，俾人知道我仲係無拖拍，好瘀架嘛！就算真係去睇戲，我都會特登選早場去睇。不過呢一兩年可能老左啦，週末週日想早 d 起身都好難，所以我都有成三年無入過戲院睇戲了。(我咁講應該會嚇親人......)

最近睇 Cable TV，廣告經常播影《尋找快樂的故事》的故事片段，睇 d 片段好像好感人咁。仲有那齣《愛與淚相隨》、Spider Man 3 等，我都幾有興趣睇。不過都係個句：我起到身至算啦！

(06:55)
最近才想通，呢幾個月寫 d 我唔在行的 topic，原來對於交新 blog 友係無乜幫助 (可能我人緣差掛!)。就算前個排格仔簿上左鮮奶首頁，只係增加左 CD-Rom 的數字。其實點樣 keep 到讀者，係本 blog 既最大問題......點解人地 d blog，開多我一兩個月，有 d 仲遲過我開，不過佢地仲多人睇，仲多人去留言 (即使係九唔搭八的留言)。

其實我都好似 We'll Never Walk Alone 的女主角 Ceci 一樣，好憎一朝早就趕頭趕命地搭 shuttle 的日子，而且返工放工總車程來回都成 >3 hrs，係車度又黑媽媽，想睇下報紙雜誌都睇得好辛苦。

唉......尋晚又一覺訓到天光。想寫的足球文章始終都係無寫到。

明晚又有連場大戰喇，小妹想徵求不眠秘方呢！咖啡對於我黎講係無用，有時深夜睇睇下波都會坐係椅子度訓著左架！

我又要趕搭車了......得閒再講。

(13:00)
食完飯，唔想開工，就梗係到左寫下無謂野既時間啦。

呢排都好多鮮奶鄰居談及乜野係 blog 之類的話題喎。其實呢個 topic 間唔中都會o係鮮奶度出現，不過又唔見 Y!blog 有咁多人講呢類話題！

其實 blog 入面要寫 d 乜，真係咁重要咩？有 d 人鍾意藉著 blog 宣揚一些信息，有 d 人鍾意講下政治、娛樂圈、寫詩、運動、烹飪、男女關係及生活感想、把自己的故事或繪畫作品放上 blog 等，各式其式。不過有 d 對 blog 抱有很大使命感的鄰居，便對一些日記式的文章嗤之以鼻，或者好似小妹呢 d 《無聊隨筆》up 得出就 up 既文章，分分鐘都會被指為「垃圾文章」架。

我諗每個人選擇係鮮奶度開 blog，總有佢地的原因，雖然各人開 blog 都有不同的目的，有些想搵些志同道合的好友、想把自己的作品公諸於世、或者純粹只為抒發自己的情感等等。不過有些希望藉著自己的 blog 的言論，改變其他人對 blog 的取向，甚至改變社會的話，我想很難行得通呢！因為每個人都係一個獨立的個體，有各自各的背景、興趣和思想，雖然有些人抱有偉大的任務，不過相信大部分人都只係想藉著文字去訴說內心的感受咋。

其實個個人的意見都不盡相同啦，能容納不同聲音，才是一個健康的社會呢。點解要話寫日記既 blog 係「高級 Xanga」呢？咁點解 blog 的內容主題唔可以百花齊放呢？

================
話時話，我都好懷念以前成日玩 newsgroup 同埋開「個人谷」的日子，係個人谷度真係鍾意 up 乜都得架，同 d 網友玩下 chat post，都幾高興架！不過而家 d 人都唔興玩 newsgroup lu，個個唔係玩 forum 就係玩 Xanga，不過 newsgroup 始終跟前兩者唔同呢。

如果要係 blog 度搵朋友，建立小圈子既話，除非我 d 文真的好到非看不可，或者我成日去鄰居的 blog 度留言，不過講真以上呢兩點真係好難做到，因為時間真的很有限啊。

今晚有四場歐聯，咁我睇邊場好呢？其實我想睇下今晚里昂 vs 羅馬的賽事。不過今晚的利物浦 vs 巴塞，相信一定係所有球迷的焦點。如果我屋企有兩部電視機既話，我想兩場都同時睇晒呀~~

雖然我唔係好熟里昂同埋羅馬 d 波，不過今晚我會睇好里昂可以晉級。因為我上兩個星期睇過佢地首回合的賽事，我覺得里昂的踢法俾人的感覺好穩陣，雖然個場羅馬稍為控制到戰局，不過里昂都一一把危機化解到。同埋羅馬個場都踢得幾茅下。

還有我覺得巴路士去到邊都無乜作為，之前係維拉都無乜表現架啦，而家仲要去左里昂，會唔會整衰埋里昂架？ 上次佢後備入替，上場得十幾分鐘，加上佢都唔係乜o野後備殺手，所以都幫唔到球隊入到重要的一球。

(add on 7-March: 我真係燈，羅馬作客嬴 2:0 晉級)

=================
講起上黎小妹都好耐無寫過關於世界足球的東西了。講真要寫一篇似樣的足球文章都要花許多時間，不過閱文人數就跟我寫文時間的比例不成正比，即係所謂的「時間成本高，業績成效低」，除非我篇文能夠俾鮮奶 admin 賞識而入到今期推介。

同埋發覺原來鮮奶都唔係咁多足球同好o既，睇下底下個篇《南華 vs 橫濱水手》，同埋之前阿仙奴對漢堡的 preview，re 文既人都唔係講波o既......可能真正的足球同好，都唔會走上黎我呢個唔專業球迷的 blog 度講波啦。

所以我都好明白點解我的鄰居科蘭都有點無奈，read post 搵貼士既人就多，不過 re 既人就只有同他熟的戰友。

要照顧跟自己品味唔同的讀者都好有難度架。原來係鮮奶寫下關於男女關係、時事、社會現象等的文章先至會比較多人睇。

=================
在元宵節那天，我的第一篇小說《We'll Never Walk Alone》終於面世了。點解偏偏要揀呢日首度連載呢？咁梗係有原因啦！不過至於係乜野原因？到呢個故仔完左咪知囉~

我o個篇嘔心瀝血的《給二十多歲女子的說話》終於都寫完，咁餘下的時間就要努力完成埋我的上海遊記了。

《無聊隨筆》呢個專欄首先同大家拜個肥豬年先，恭喜恭喜！

嘩~~ 乜 now 除o左來季播英超，仲要播埋 J-League 同埋部分意甲o添！有線好似話會播多三季德甲西甲，唔知 now 仲會唔會拿埋呢？

講真 now 有 d 講波佬好唔掂呀，有時連球員名都講錯。

唔知道我可唔可以向有線申請，剩係睇娛樂台、足球台同埋球彩台呢？而家我要俾 $199 一個月o架~~嗚嗚~~我張 contract 好似仲有大半年o添o架......

=================
自從戒賭以後，發覺真係得閒o左好多！
唔覺唔覺由年初一至年初三，我一共訓左超過 40 小時。
不過我 harddisk 的足球賽事存貨，到而家睇都未睇過，可能到o左我放下一次悠長假期先至去清理囉！

今日是 2 月 15 日，實在很好，因為那所謂的節日終於過去了。

為免被一些已有著落的同事揶揄，昨日我比平日更自閉，見到同事也不會閒聊，就算談也只談公事，講完就馬上收線，就是不想被問起:「今晚去邊度玩呀？」

只有爸媽見怪不怪，大概他們都不會期望自己的女兒會好命地嫁出去。

其實並非自己不努力，只是命運弄人吧。

話說幾日前我在本 blog 度 reply Ian 說︰「賭波? 贏左咪又係輸番轉頭，得個桔！」

點知我真係烏鴉口，上個月嬴左千幾蚊，不過尋晚已經輸得七七八八喇！明明我只係諗住買利記主勝 $100，點解我會襟多左一個「零」既？？？真係邪爆！！！結果係點？相信尋晚有睇利記對拖肥糖個場波就知，利記就係俾我買死左了......

好彩尋晚聽利禾強講，佢話阿仙奴嬴唔到喎，本來諗住亨利追和後，想買番少少阿仙奴客勝架嘛，個陣客勝好似有 3 倍幾......

原來由 2007 年 1 月到今日，我共嬴左 $175。但係經過尋晩一役後，我決定長抖一排了。

所以唔吉利既說話千祈千祈唔好講！尤其係農曆新年就黎到了，希望大家都「好既靈，醜既唔靈」啦！

今日在《球彩俱樂部》的節目裡，個班蛋散主持話某酒店在 2 月 14 日攪乜乜 single party 喎，又話乜野一班無人陪的女人係一間房飲下酒，一齊過情人節咁話喎......

班蛋散係咪吹水架？邊間酒店做緊類似的 promote 呢？

如果真係有類似的 party 又好似幾好咁喎，至少我 join 左，o個晚有機會識番幾個好似我咁孤獨的女性朋友，之後大家無聊時都可以約出黎食個 tea 丫......

(updated on 27-Jan)
班主持講既野係真架，有人在 forum 話曾經見到某酒店有廣告，不過佢話唔記得左係邊間。如果各位知道係邊度攪，麻煩你留言通知我，感激不盡，謝謝。

(updated on 1-Feb: 特別嗚謝蘋果日報和本 blog 讀者 lalala 報料)

【 本 報 訊 】 今 個 情 人 節 ， 旺 角 朗 豪 酒 店 首 次 為 一 眾 沒 有 男 友 者 設 想 ， 姊 妺 們 在 情 人 節 入 住 酒 店 ， 可 獲 贈 絲 質 睡 衣 開 「 睡 衣 派 對 」 ； 半 島 酒 店 則 為 愛 侶 打 造 一 個 三 日 兩 夜 豪 華 情 人 節 ， 盛 惠 11 萬 元 。 但 最 令 情 人 心 甜 的 ， 相 信 非 濃 情 朱 古 力 莫 屬 。 記 者 ： 蔡 朗 清

但 說 到 最 有 噱 頭 ， 要 數 朗 豪 酒 店 為 姊 妹 們 而 設 的 情 人 節 睡 衣 派 對 ， 發 言 人 稱 ： 「 住 宿 套 餐 包 括 絲 質 睡 衣 、 薄 餅 爆 谷 等 ， 冇 男 友 既 姊 妹 開 個 睡 衣 派 對 ， 談 天 說 地 玩 通 宵 。

機 構 ： 朗 豪 酒 店 （ 3552 3552 ）
項 目 ： 姊 妹 好 友 睡 衣 派 對 之 夜
價 錢 ： 1,100 元 起 （ 每 位 ）
部 份 特 色 ： 一 晚 住 宿 連 自 助 早 餐 、 獲 贈 絲 質 睡 衣 及 享 用 腳 部 修 甲 或 面 部 護 理 服 務
http://hongkong.langhamplacehotels.com/packages/valentines_specials.htm

其實這並非酒店攪的 single ladies party，而是幾個單身女子自己約埋租一間房，所謂的 party 節目其實係要自己安排架! 咁既話不如召集幾個單身女仔，個晚求其係某女友人家攪個 single party 啦!

尋晚睇過有線既《活得很滋味》，主持人介紹曼谷這地方。睇完先知，原來泰國好多地方都有英文既指示牌架......我諗就算自由行都唔怕蕩失路掛?? 睇黎泰國好似好好玩咁，原來唔只係做下 spa，見下白龍王，游下水晒下太陽咁單調架??? 其實去到剩係做下 spa 都抵，在香港做都要起碼千幾蚊一次，而在曼谷做會平好多，更何況個度 d 風景咁靚，又多好o野食同埋好多o野買。

點解今年 X'mas 我無選擇去泰國呀? (後悔中 )

可能近呢一兩年經濟改善左，所以 X'mas 假期期間好多人都出外旅行，而好多自遊行 package 都 fully booked 喇。三年前我係在 X'mas 期間去台北，在 12 月初才訂機票酒店咋！可想而知今年 X'mas 將會有好多港人出國旅行。

我本來諗住 24-28/12 出發去東京、吉隆坡、新加坡，不過我在今個星期先開始問價，而好多 agent 的回應，以上所有地點不是無機位就係二人同行的 package 才有位 (所以話做單身少姑婆真係慘!)。

好想去馬來西亞或者新加坡食o野呀~
好想去東京 Disney 呀~
嗚嗚~~~~

如果我肯跟團既話，或者仲有得去既。不過自從我的第一次單獨旅行跟鴨仔團之後，我發誓以後都唔會一條友參加旅行團。

不過幾經辛苦，今日我終於訂了機票和酒店了，咁我的悠長假期總算不至於太浪費。哈哈。至於我將會去邊？請讓我賣個關子先，去完返黎先話你知，嘻嘻~ :D

東京..... 都係等到櫻花盛放的時候才去......
馬來西亞新加坡......都係等我搵到志同道合的伴侶時才去......唔係得我一條友點食得晒咁多o野?

我o岩o岩發覺，我四周圍搵左咁多足球片，原來未睇晒o架!?

幾時有得放大假呀？我諗我可能好快就有得放「悠長假期」了，

如果真係會放「悠長假期」，咁我應該會睇得晒所有搵番o黎的片...... 仲有，我諗我會日日做運動，為求瘦身成功。

如果真係放了「悠長假期」，我希望有機會轉行，不再做和現在差不多的工作。

今日二揀一，就係留在家中看 J-League，或者到旺角大球場睇港甲。結果我還是選擇看 J-League 的直播賽事︰浦和紅鑽對橫濱水手，賽果是浦和紅鑽小勝 1 比 0。

講真我有少少後悔無出旺角場睇波呀......

呢場波無我預計中咁好睇，浦和紅鑽現在排在聯賽榜首名，可是今場並表現不到其皇者風範。小野伸二的缺陣對於紅鑽的中場組織有好大的影響。有點覺得好似睇緊港甲咁，紅鑽今場的中場無乜組織，成日就咁吊個高波上前面。而水手的前鋒真係唔多掂，成場波都做唔到乜野有威脅的攻勢。不過防守方面紅鑽同埋水手都做得幾好既，回防都幾快架。其實全場最好睇就係臨完場前 10 分鐘左右，水手不停係咁攻，紅鑽就全軍塞晒在禁區防守，紅鑽的 fans 在那一刻也許很緊張吧。

在螢光幕所見，紅鑽主場的氣氛確是不錯，許多主場球迷都穿上紅色的主場球衣，站起來拍手、唱歌、高舉橫額打氣，在球場的欄杆也掛滿球員名字的橫額。不知將來在港甲的比賽裡，我們有沒有機會見到這種情景呢？

另外明日阿仙奴對利物浦，我估利記作客不敗的。希望利記唔好俾我「燈」到啦！

下星期三晚上八時正在旺角大球場，將會上演香港對孟加拉的亞洲盃外圍賽賽事。雖然香港隊出線無望，不過如果閣下身為香港足球的支持者，當晚會入場為港隊打氣嗎？

今日覺得好頭暈，明日真係唔想返工

睇睇下韋斯咸對阿仙奴，上半場真係好悶，加上我又頭暈暈咁，於是訓左一陣，不過差唔多臨完場個陣，我俾韋斯咸希活的入球和球彩台主持的叫聲吵醒了！阿仙奴連續三場嬴唔到波，今場又係作客對曼城的翻版 - 輸鬼埋！

我覺得阿仙奴的踢法俾好多球隊睇通晒，只要佢地在門前塞滿晒後防，便可以攔截阿仙奴的小組推進。

可能阿仙奴需要一些柱躉式的球員，製造多些角球入波的機會。同埋路斯基唔該練好 d 遠射，次次見親你射門都唔知射左去邊o既！

以上咁既說話，我諗如果 post 上去阿記 forum，實會俾人插死。其實呢度人流唔多都有其好處......

廷伸閱讀 - 往年的阿仙奴去了哪兒?

P.S. 呢兩日 d 賽果好驚嚇喎，里昂，車仔都輸波........

各位忠實的球迷睇見呢個標題，唔知有無同感呢？

眾所周知，由於歐洲地區現正實施冬令時間，所以冬春兩季的足球賽事都比夏秋季推遲一小時，那麼香港的球迷如果週中想收看歐聯的賽事，就要記得把鬧鐘調到 3:30 - 3:45 a.m. 左右呀。

不過當歐聯賽事完場後，時間約為 5:30 a.m.，對於我這些最遲要在 6:30 a.m. 起床梳洗的上班族來說，就真的唔知去睡覺好？還是唔睡好呢？如果我選擇睡一會的話，也許會睡過頭，因為我是那種即使較了鬧鐘也不會被吵醒的人！如果不睡的話，卻不夠時間「叉叉電」，加上我一定要趕及八點左右開出的公司巴士上班，所以現在的比賽時間確是有點叫我煩惱。

趁我岩岩食完lunch，等我無聊下啦。

好想冬天快點來臨呀,除了可以穿厚厚的衣服,遮掩我身上的肥膏之外,還可抵禦公司寒冷的空調。而且我很喜歡戴頸巾，穿長靴等。

呢排好唔開心呀，睇完肥田囍事，聽完球彩俱樂部阿鵬強尼阿聲等講笑後都唔識笑......